محمد صادق عن فيلم أصحاب ولا أعز: لم يشجع على المثلية الجنسية والخيانة.. وممكن أكتب زيه
كشف الكاتب محمد صادق، رأيه بـ فيلم أصحاب ولا أعز الذي أثار الجدل على مواقع التواصل الاجتماعي مؤخرا، بسبب ما يحتويه من مشاهد وألفاظ جريئة وخادشة للحياء.
وكتب محمد صادق عبر خاصية ستوري على حسابه الرسمي على موقع تبادل الصور والفيديوهات انستجرام: أنا شوفت النسخة الإيطالي والإسباني والأمريكي والعربي من فيلم أصحاب ولا أعز، والفيلم أخد جوائز كتير عشان بيضرب في مناطق الناس مش بتحب تتخبط فيها وتصدق وهم المثالية والشعارات.
وواصل صادق: وأنا بحب أكتب عن القضايا التي يتناولها الفيلم في رواياتي، ولكن عندي تحفظ على البطل الشاذ جنسيا في جميع الأجزاء لم يعجبني وكان متصنعا جدا، بس هو دا الفن يعرض عليا شيء وأنا أخد اللي يعجبني منه وأرفض اللي مقتنعش بيه.
منى زكي وإياد نصار
وأضاف محمد صادق: مش شايف أن الفيلم شجعني على الخيانة أو الشذوذ أو أعمل عملية تكبير لصدري، والفيلم لم يؤثر في قناعاتي وعقلي؛ لأن العقل نعمة كبيرة ربنا كرمنا بيها، أما عن قصة زواج منى زكي وإياد نصار لازم توجع لأنها تعكس 85% من حالات الزواج في الواقع، ويمكن أكتر من كدا كمان، وطبيعي تثير الجدل وتوجع الرجالة قبل الستات؛ لأنهم فاكرين لوحدهم اللي بيخونوا وكلهم حسوا أن شخصية منى زكي حته منهم وعشان كدا زعلوا واتحمقوا.
واختتم محمد صادق حديثه قائلا: الفيلم لطيف ولو ضايقك أو استفزك يبقى لمس حته جواك لازم تعترف بيها، ولو مضايق وخايف على قيمك يبقى من حقك ترفضه وخد بالك من اللي حواليك ووعيهم، لكن الخلاصة أن مفيش حد من حقة يمنع التاني يشوف الفيلم، أنا من حقي أتفرج وأنت من حقك ترفض.. لا أنا فاسد ولا أنت رجعي.
