عصام يوسف خلال ندوة عن والده بمعرض الكتاب: اهتممنا بمكتبته وأغفلنا كتبه
حل اليوم الروائي والإعلامي عصام يوسف، ضيفا على فعاليات معرض القاهرة الدولي للكتاب، في جلسة نقاشية حول أعمال والده الراحل عبد التواب يوسف، والذي اختير ليكون شخصية العام في معرض الكتاب لكتاب الطفل.
وخلال حديثه، وجه عصام يوسف الشكر للحضور والمنظمين قائلا: بشكركم جدًا أنا بتبسط أكثر لما بسمع عن والدي مش لما بتكلم عنه، لأني ببقى عايز أعرف تفاصيل حياته إيه، سمعت كتير حاجات جميله جدًا عنه، مكنتش أعرفها طبعا والدي الله يرحمه كان حكاية هو نفسه حكاية انا محظوظ أنا وأخواتي إن إحنا حنا عيشنا معاه.
وأضاف يوسف: عايز أعقب على أكتر من حاجة، مهمة والدي كان سياسي، كان عضو في اتحاد الاشتراكي، وكان نائب رئيس اتحاد الاشتراكي في فترة ما، ولكن مع أول مشكلة قال دي استقالتي، كان عايز يقعد في البيت ويكتب عن الأطفال ودي خدمته وخدمة الأطفال، عبد التواب يوسف كان من نوع مسالم وكانت قرارته حكيمة.
عصام يوسف: والدي راضي عن رسالته
واستكمل عصام يوسف: احنا فعلا مقصرين، احنا اهتمينا أكتر بمكتبة عبد التواب يوسف، مش بكتب عبدالتواب يوسف، ووالدي فعلًا محبش يظهر في الإعلام، كان أهم حاجة عنده الموضوع يتعمل، ويبقى كويس، مكنش بيحب يطلع في صورة كان فعلا عنده مشكلة في موضوع الإعلام والظهور الإعلامي، كان بيقدم رساله لبلده، وقالي مرة إنه راضي عن إلى قدمه للبلد.
واختتم: والدي كان في موضوع الأموال، غريب جدا، كان يقول مش مهم الأموال، المال بنستخدمه علشان نعرف نعيش، كان بيبقى حابب إن عربيتي تكون أحدث منه كان دائما بيحاول أن يبسطني أنا قبل منه.
