حورية فرغلي: كنت بقول لربنا ماترجعنيش ملكة جمال أنا عاوزة أشم واستطعم بس
روت الفنانة حورية فرغلي، تفاصيل رحلة مرضها الصعبة بسبب إصابتها في أنفها، ومعانتها لمدة 5 سنوات، فقدت خلالهم حاستي الشم والتذوق.
وقالت حورية خلال لقائها في برنامج كلمة أخيرة، تقديم الإعلامية لميس الحديدي، المذاع عبر قناة on: كنت بقول لربنا ماترجعنيش ملكة جمال أنا عاوزة أشم واستطعم بس، وأحيانًا كنت بقول يمكن ربنا عمل كده عشان مش عاوزني في التمثيل.
كنت بسأل نفسي أنا عايشة ليه؟
وأضافت: عشت فترة صعبة جدًا وما كنتش بطلع بره غرفتي وبتجنب أشوف نفسي في المرايات وكنت بسأل نفسي أنا عايشة ليه وكنت بتمنى الموت كل يوم، وآخر حاجة كنت بفكر فيها أن شكلي يرجع كويس.
وتابعت: كل أصحابي تخلوا عني وبقيت وحيدة واشتريت كلاب عشان أحس أني محبوبة، وفقدت الثقة في نفسي وكانوا بيقولوا لي إنتي شبه مايكل جاكسون.
وعن أصعب لحظة شعرت بها، قالت: أصعب لحظة أني قررت أني مش هبص لنفسي تاني في المراية خاصة أني كنت ملكة جمال.
وأكدت الفنانة أنها شعرت بالأسى والصدمة بعد اختفاء كل من حولها بعد الإصابة والمعاناة قائلة: الهوليلة اللي كانت حواليا اختفت بمجرد سقوطي سواء اللي عاشروني عشرة أو 15 سنة، أو اللي ساعدتهم على الزواج ووقفت جنبهم، كلهم اختفوا لما وقعت، وتليفوني مكنش بيرن، وكنت بقول لنفسي هل كنتوا حواليا عشان شغالة كتير وقتها؟!.
