حمو بيكا يُلمح بتزوير لجنة نقابة الموسيقيين اختبارات 13 مطرب مهرجانات
أوضح مطرب المهرجانات حمو بيكا رأيه في نجاح 13 مطرب مهرجانات تم إنشاء لجنة خاصة لهم في محافظة طنطا، ويُلمح لوجود تزوير بتلك اللجنة.
وقال حمو بيكا، خلال برنامج مصر جديدة الذي تقدمه الإعلامية إنجي أنور: أنا لما روحت النقابة واترفع عليا قضية لما اتقال إني غلط فيها أنا مغلطش في النقابة، أنا قولت لأستاذ هاني شاكر لو أنت بتمثل النقابة لازم تنزل تشوف إيه اللي بيدور فيها، أنا بقول الكلام ده مش فارق معايا حاجة
لأني بقالي 5 سنين بيوقفوني ويقطعوا عيشي، أنا كل شغلي من برا مصر ومفيش حاجة في مصر، إزاي أبقى في بلدي وكل حياتي هنا ويقولولي ما تشتغلش في بلدك.
تلميح حمو بيكا بتزوير نتائج الاختبارات
وأضاف حمو بيكا: أصل أنت مش ربنا وأنت عبد زي ما أنا عبد واللي خلاك تتحكم فيا إن ربنا مديك سلطة، بس أنت بتستخدمها غلط، أنا عايز أعرف إزاي يبقى فيه 13 شخص كانوا ممنوعين، ويتشكلهم لجنة في طنطا وامتحنوا ونجحوا، فيها أستاذ حمادة أبو اليزيد وأحمد رمضان بيحكموا، وأنا يجيبولي في لجنة ناس من الأوبرا ويقولولي روح اتعلم وبعدين تعالى.
وتابع مطرب المهرجانات: عايز أعرف ليه لما أطلب إني أروح معاهم في لجنة طنطا دي يتقالي لا ويتوافق لهم هما؟، إحنا برا الناس بتقدرنا فوق ما تتخيل وبنتشاف، وأنا أول واحد قدم أوراق مظبوطة بس حرام عليك بقى اللي بيحصل فيا ده بطالب بلجنة كبيرة تتشكل وتعيد تقييمها من تاني في الناس اللي أخدت كارنيهات دي واللي هيحكموا بيه أنا راضي بيه ويبقى قاعد فيها أستاذ هاني شاكر وحلمي بكر.
