عمرو سلامة: ماجد الكدواني مكنش الاختيار الأول لفيلم برا المنهج
أقيمت اليوم ندوة لـ فيلم برا المنهج، ضمن فعاليات الدورة الـ47 و48 من مهرجان جمعية الفيلم في مركز الإبداع الفني، وحرص المخرج عمرو سلامة على الحضور وتحدث عن كواليس فيلم برا المنهج وسبب اختياره للنجوم.
وقال عمرو سلامة خلال الندوة: إن ماجد الكدواني مكنش الاختيار الأول، كان الاختيار الثاني في الفيلم، وفكرت في فنان لكن محصلش نصيب.
وأضاف سلامة: لكن بالصدفة وأنا بكتب الفيلم جيه في بالي ماجد الكدواني، ووقتها ماجد الكدواني مكنش لايق للدور ولكن دلوقتي اتنعت أنه أكتر واحد لايق على الدور.
عمرو سلامة: بتعمد أحط الأطفال تحت ضغط
وتحدث عمرو سلامة عن كواليس اختيار الأطفال في الأعمال الفنية، قائلا: الأطفال أو أي وجه جديد قبل ما أختاره لازم أعمله تجارب أداء كتير جدا، في فيلم لا مؤاخدة شوفنا آلاف الأطفال، وإحنا بندور على طفل موهوب وذكي وبيعرف يشتغل تحت ضغط، وبتعمد أحطهم تحت ضغط كبير علشان أشوف هيعرف يشتغل تحت ضغط ولا لا.
وواصل: أنا مكتشف الفنان أحمد داش وأيضا عمر الشريف، وخلال أحداث الفيلم بحاول يكون الفنانين طالعين مختلفين لما الموضوع بيتكتب بشكل جيد ومختلف الفنانين بتطلع مختلفة تماما عن أي دور قدموه قبل كده.
فيلم برا المنهج
الجدير بالذكر أن فيلم برا المنهج من تأليف عمرو سلامة وخالد دياب، وإخراج عمرو سلامة، وضم الفيلم عددا كبيرا من الفنانين، من بينهم ماجد الكداوني، روبي، أحمد أمين، أسماء أبو اليزيد، دنيا ماهر، وأحمد خالد صالح.
