شوبير: أتمنى الفنانين والمشاهير ميسافروش للماتش.. خلوا المشجعين اللي بجد هما اللي يروحوا
رد الإعلامي أحمد شوبير، على التخوف الذي يسود الشارع المصري، من التلاعب خلال مواجهة منتخب مصر أمام الكاميرون في نصف نهائي بطولة كأس الأمم الأفريقية وأيضا من حكم المباراة.
وقال أحمد شوبير خلال تصريحات إذاعية: أنا عكس مصر كلها في موضوع الحكم، أنا مش قلقان منه، إحنا دولة كبيرة، والكل يعملنا ألف حساب، ومستحيل يحصل تلاعب في مسحات المنتخب.
وأضاف شوبير: الحكم السنغالي بتاع مباراة المغرب اللي الكل هاجمه، أنا كنت شايفه مش متربص لأنه لو متربص، كان حسب ركلة الجزاء لوحده لأنها ركلة جزاء صحيحة، والفار هو اللى استدعاه، وطلب منه يحسبها عشان مفيش تربص هي مجرد أخطاء عادية.
نشكر المغاربة على عدم تقديم شكوى ضدنا
وتابع شوبير: لاعبو مصر رجال، لو مركزين زي مباراة المغرب هنكسب الكاميرون، وهنعدى لو مين الحكم، مستوى الفراعنة مميز بلاش نخاف من حاجه مش موجودة.
وواصل شوبير: عاجبني التصريحات اللي خرجت من المغرب، وقالوا فيها لن نشكو المنتخب المصري، وأنا شوفت فيديو الخناقة اللى بيقولوا عليه أكثر من مرة، وهو الحقيقة مش موضح أي حاجة، ولو حصل عقوبة تبقى بعيدة عنا، كل الاحترام للأشقاء.
وشدد أحمد شوبير في نهاية حديثه: أتمنى إن المشاهير ميسافروش ولا فنانين ولا كتاب ولا غيره.. خليكم قاعدين واتفرجوا على المنتخب من البيت أو من أي حتة خلوا المشجعين اللي بجد هما اللي بيروحوا.. خلوا اللي ياخد اللقطة اللاعيبة في الملعب والجمهور اللي بجد.
