الحمد لله إنها جت علي قد كدة.. فتاة تتصدى لسارق بعد محاولته التحرش بها
نشرت فتاة تدعي إيمان فتحي منشورا علي موقع التواصل الاجتماعي انستجرام بعد تعرضها للتحرش من أحد الشباب ومحاولة سرقة حقيبتها قائلا: أولا الحمد لله إنها علي قد كده، ثانيا الكلام اللي حصل ده تحت بيتي، الحكاية إني مروحه بيتي وانا داخله علي أول الشارع، هو دخل ورايا كان بيحاول يشد الشنطة من وسطي، عشان انا لابساها زي ما في الفيديو كده عمل حركة قذرة، ومامتي كانت واقفه في الشباك شتمته بكل بجاحه خلص الشارع ولف رجعلي تاني وانا شوفته انو جاي عليا ولما دخلت بين العربيتين كنت بدور علي اي حاجة اضربه بيها ملقتش وضربته برجلي في الموتوسيكل وقع وهو بيقع ضربني في وشي وقعني علي الأرض الحمد لله بوقي اتفتح ووجع في ضهري وايدي.
التحرش بفتاة ومحاولة سرقتها
وأوضحت إيمان أن المتحرش كان يملك سلاحا أبيضا موضحة: كان ماسك آلة حادة كان ممكن يضربني بيها، اللي انا عايزه أقولو إن علي قد إني باينه إني متمسكة وقوية، علي قد ما أنا بعد ما الموقف خلص، أنا أعصابي كانت سايبه، بس في الآخر بقول الحمد لله إنها جت علي قد كده.
ووجهت إيمان نصيحة للفتيات بالحفاظ علي أنفسهن مضيفة: عايزه أقول لكل بنت تخلي بالها من نفسها وياريت أي بنت تخلي في إيديها أي حاجه تضرب بيها لو لقدر الله حصلها أي موقف، وربنا ينتقم منه هو وأي حرامي أو متحرش يفكر إنه يعمل كده، وربنا يسترها عليا وعلي كل البنات.
