النني: مبسمعش للسوشيال ميديا ونفسي ألعب في برشلونة
تحدث محمد النني لاعب منتخب مصر الأول لكرة القدم والمحترف في صفوف أرسنال الإنجليزي، عن كيفية تعامله مع الانتقادات التي يتعرض لها من خلال مواقع التواصل الاجتماعي.
تصريحات محمد النني مع ميدو
وفي لقائه مع أحمد حسام ميدو، مساء اليوم الثلاثاء، قال النني: أكيد بنسمع من صحابنا مش من السوشيال ميديا، الحاجات دي مبتأثرش فيا أنا باخدها بدافع جوايا، والحمد لله أنا كويس وبلعب في نادي كبير، الناس بتقول النني بيلعب في أرسنال وإيه اللي بيقدمه لمنتخب مصر.
وواصل النني: لو الناس ركزت في مباريات نيجيريا وغينيا والسودان فأنا بتطور من ماتش للي بعده، وخدت أحسن لاعب في ماتش كوت ديفوار، أنا بشتغل على نفسي في التمرين وبتطور، لو مشيت ورا الكلام هتعطل، الحمد لله بقدر أعمل ده وبشتغل على نفسي، كل يوم بصحى عندي حلم عايز أحققه.
النني: نفسي ألعب في برشلونة
وأكمل لاعب الفراعنة: بره بيركزوا في التفاصيل الصغيرة أكتر من الكبيرة ودي اللي بتبني شخصيتك، وأنا الحمد لله بسمع، وفي مسيرتي كلها المدربين اللي دربوني بيحبوني، ودايما ببقى عايز أطور، والحمد لله إصاباتي قليلة، والنوم بدري ده مهم جدًا، وقلة النوم هتخليك مع الوقت هتقل وتركيزك هيقل.
واختتم النني تصريحاته: لما كنت في بداياتي واحد سألني نفسك توصل لإيه، قلتله نفسي ألعب في برشلونة، أنا كده دايمًا بفكر في أحسن حاجة ممكن أوصلها، ودايما بركز في شغلي وأنا عارف عايز إيه.
