ابنة سيد القمني لـ القاهرة 24: أبويا مات مستور ورأسه مرفوع.. واشترى بلده والناس كلها
قالت سلوى سيد القمني، ابنة المفكر الراحل سيد القمني، إنها سألت والدها سيد القمني قبل وفاته، عن سبب امتناعه عن الحصول على مقابل مادي، نظير استاضفته في البرامج أو الندوات التي يذهب إليها؛ نظرًا لأنه لا يملك أي مصدر رزق غير كتاباته، قائلة: هو راجل مش موظف، ولا ليه معاش، ولا يتبع دار كتب أو نقابة؛ ليرد عليها والدها وقتها: قالي يا بنتي؛ لأن كلمتي أمانة، وإحنا الحمد لله مستورين.
وأضافت سلوى سيد القمني، في تصريحات خاصة لـ القاهرة 24، أن والدها قال لها إن عبد الله رشدي والحويني يأخذان ثمن حديثهما عن كتاب ربنا، ويأخذان ثمن الأية القرآنية التي يتلونها، فهم يأخذون ثمن التجارة بالدين.
ابنة سيد القمني: اللي مايعرفش ذمة أبويا أنا اللي أكلمه عنها
وتابعت سلوى سيد القمني، وهي في حالة انهيار: سيد القمني تمنه أعلى منكم، وأطهر منكم كلكم، وكعبوا أعلى منكم، واللي مايعرفش ذمة سيد القمني؛ أنا اللي أكلمه عنها.
وعلقت سلوى سيد القمني، على ما قاله الداعية عبد الله رشدي عن والدها، قائلة: مش عبد الله رشدي اللي هيقول اشترى دنيته وباع آخرته، سيد القمني اشترى الناس كلها، واشترى بلده، أنتوا اللي بعتوها؛ عشان تجارتكم بالدين، سيد القمني عاش عمره بضمير وذمة، وكعبه أشرف منك أنت والحويني، وكل اللي بيتاجروا بالدين.
وأشارت ابنه الراحل سيد القمني، إلى أنها هي من عاشت معه خلال فترة مرضه الأخيرة، موضحة: أنا اللي شوفت معاناته، وعشت معاه مرضه، الحمد لله إنه مات مستور، ولم يحتَج إلى أحد منكم، أبويا مات مستور، ورأسه مرفوع، وجبينه مرفوع، وكعبه عالي.
