مرات ابني بتدعي عليا وأنا خايفة.. مبروك عطية: خليهم يأجروا ناس كمان تدعي
رد الدكتور مبروك عطية، العميد السابق لكلية الدراسات الإسلامية جامعة الأزهر فرع سوهاج، على سؤال ورد إليه من إحدى المتابعات، تقول فيه: مرات ابني بتدعي عليا وأنا خايفة؟
مبروك عطية: خوفك دليل على حاجة من اتنين
وقال عطية من خلال بث مباشر له على صفحته على موقع التواصل الاجتماعي فيسبوك: كويس إنك خايفة، خوفك دليل على حاجة من اتنين.. خوفك وخوف أي إنسان من دعاء إنسان آخر عليه، إشارة إلى حاجة من اتنين، يا جاهل بالناحية العلمية، يا إما خايف الدعوة تصيبه لأنه يستاهل الدعوة عليه.
وأضاف مبروك عطية: خايفة ليه؟! اعملي الحكم الشرعي اللي يخلصك من ربنا واللي يدعي عليكي يدعي زي ما هو عايز وربنا السميع المجيب، ربنا ليس بظلام.. فيه ناس تعمل معاها الطيب وميعجبهاش ومتعودة على الدعوة على الغير.
وتابع العميد السابق لكلية الدراسات الإسلامية: ده لا يضرك ولا يخيفك، أنا بتقي ربنا فيك، وأنت بدل ما تدعيلي بتدعي عليا، ثقافتك كده، أمك بتدعي على الخلق وأبوك قاعد يدعي على السارحة والمروحة، أمك شغالة تدعي على خلق الله وتدعي عليهم ربنا يبتليهم، وفيه أم بتدعي على بناتها مع إن بناتها قمرات، شمعة منورة!
وأشار مبروك عطية إلى أن النبي صلى الله عليه وسلم حذرنا من الدعاء على الأولاد والنفس والدواب عسى أن تكون ساعة إجابة فلا يلومن إلا نفسه.. بطلوا تدعوا على بعض عمال على بطَال.. نعمل اللي ربنا أمر بيه، عملناه خلاص يبقى خليهم يأجروا ناس كمان تدعي علينا ولا يهمنا.
