سيد عبد الحفيظ: مكناش في يومنا ولو استغلينا 1% من الفرص كنا ممكن نسجل
علق سيد عبد الحفيظ، مدير الكرة بالنادي الأهلي، على هزيمة الفريق أمام صن داونز الجنوب إفريقي، في مباراة أقيمت على استاد القاهرة الدولي، ضمن منافسات الجولة الثالثة من دور المجموعات لبطولة دوري أبطال إفريقيا.
عبد الحفيظ: مكناش في يومنا ولكن لسه في 4 مباريات
وقال عبد الحفيظ في تصريحات تلفزيونية عقب المباراة: مكناش في يومنا خالص لكن هي دي كرة القدم، طبيعي بتخسر على أرضك ودور الجموعات بيبقى عبارة عن تجميع نقاط، ولكن في المجمل لسه في 4 مباريات.
وأضاف: نقدر نعوض ولكن اللي أقدر أقوله إن اللي جاي مش سهل خالص، عندنا مباراة مع المريخ يوم 5 ومباراة مع بيراميدز يوم 8 وقبلهم مع فاركو، وبعدهم هنروح لصن داونز جنوب إفريقيا.
عبد الحفيظ: لو استغلينا 1% من الفرص كنا ممكن نسجل
وعن ضغط المباريات، أوضح عبد الحفيظ: في إفريقيا ممكن يجيلك مباراة بالشكل ده، عدد الفرص اللي ضاع النهارده لو استغلينا 1% منها كنا ممكن نسجل، لكن هنقفل الصفحة، السنة اللي فاتت اتعادلنا على نفس الملعب مع فيتا كلوب، اللي جاي تحدي كبير جدا، احنا أبطال إفريقيا بس محتاج إننا نقفل صفحة النهارده.
واختتم مدير الكرة بالأهلي: دروس الكرة متكررة، ده بيحصل في العالم كله، احنا بنلوم نفسنا، وهنشوف هنعمل ايه عشان نرجع نحافظ على فرصنا، والهدف من دور المجموعات هو الصعود، سواء مركز أول أو مركز ثاني، النهارده كنت أتمنى نحقق نتيجة أحسن من كده بس اللي حصل درس كبير ممكن نتعلمه.
