أحمد وفيق: مخرج بيت الشدة موهوب وهيكون اسم كبير في الدراما
أشاد الفنان أحمد وفيق بالمخرج وسام المدني، الذي يخرج مسلسل بيت الشدة، في أول تعاون فني يجمع بينهما، مؤكدا أنه مخرج موهوب، وسيكون له اسم كبير في الدراما المصرية.
وقال وفيق، في بيان صحفي: قبل ما أشتغل بالمسلسل، وأتعاقد عليه، سألت عن وسام وشفت شغله، ووقعت على بيت الشدة وأنا مطمئن، لأني لازم أكون مقتنع بالمخرج أولا.
وتابع: أحد أسباب تحمسي للعمل وجود وسام المدني كمخرج، وعندي إيمان كامل إن الموهوب بيبقى موهوب من بدايته مش شرط يقعد 60 سنة أو 10 سنين عشان يبقى موهوب، ومن واقع خبرتي وشغلي مع الأساتذة الكبار بالإخراج، ومن كلامي مع وسام وشغله اللي قبل كدة اللي شفته، واضح إن عنده رؤية وشخصية خاصة به.
وأوضح: مخرج طازة ومش بيشتغل على المعتاد، وعايز يثبت نفسه، ودي أعتبرها فرصة لي إن أبقى معاه، وهو جزء كبير من موافقتي على العمل، بالإضافة إلى الفكرة المبني عليها المسلسل.
واستكمل: بيستهويني المخرج اللي عنده فكرة التأليف بجانب الإخراج اللي بيتمتع بهما وسام، لأنه بيبقى عايز يقدم وجهة نظره، وكل ما كانت وجهة النظر خاصة، كل ما كانت العملية الفنية أكثر، لأن الفن وجهات نظر.
وأضاف: توقعاتي إن وسام هيكون اسم كبير في الدراما المصرية، وده توقعته لمخرجين غيره قبل كدة، وبقوا أسماء فعلا دلوقت على الساحة، ووسام من الناس اللي هيبقى ليهم اسم مهم في الدراما، وأتمنى أننا نكون جزء من عوامل نجاحه، وإن شاء الله يبقى محسوب لينا إننا كنا في ضهره، وأتوقع له النجاح إن شاء الله.
تفاصيل مسلسل بيت الشدة
مسلسل بيت الشدة يخوض بطولته النجمان وفاء عامر وأحمد وفيق، ومن المقرر عرضه في دراما رمضان 2022، ويشاركهما في بطولة المسلسل، النجوم: إيهاب فهمي، مها أحمد، محسن منصور، أحمد التهامي، مدحت تيخا، محمد مهران، عبير منير، صبري عبد المنعم، لبنى ونس، منى العمدة، وعدد من الفنانين، ومنتج فني عوض ماهر، ومدير تصوير عزمي الرحماني، ومن تأليف ناجي عبد الله، ومن إخراج وسام المدني، وإنتاج شركة اكسيليفون للإنتاج الفني.
