الحاجة سمية تستغيث: من سنتين وأنا في الشارع والغريب أحن عليّا من عيالي | فيديو
استغاثت سيدة تدعى سمية، تبلغ من العمر 57 عاما، من منطقة المنشية بالقاهرة، من قسوة قلب وجحود أولادها الثلاثة بعدما طردوها منذ سنتين من منزلها وورثوها بالحياة، موضحة: أنا قاعدة في الشارع بقالي سنتين وظروف ولادي على قدهم ومحدش بيسأل عني فيهم وبدعي من ربنا إنه يكرمني بأي مساعدة.
عيالي طردوني وورثوني بالحياة
بصوت يملأه الألم قالت السيدة سمية من خلال بث مباشر عبر موقع القاهرة 24، إنها كانت تسكن في أحد الأماكن وصاحب المنزل طردها لعدم سدادها قيمة الإيجار المطلوب، متابعة: مفيش بيني وبين ولادي أي كلام بقالي سنتين روحت لابني قبل كده وبعدها مشيت لوحدي علشان مراته صحيت لقتني نايمة في الصالة غضبت مني، وأنا من النوع اللي بتكسف.
وتابعت السيدة سمية: أنا دلوقتي بنام وعايشة في جراج في المطلع، وببيع مناديل علشان أصرف على نفسي، وساعات ببيع جرجير والحمد لله عايشة، نفسي في مكان أعيش فيه وآكل فيه لقمة عيش، بتمنى من ربنا أعمل بطاقة شخصية وشهادة ميلاد علشان مش معايا لأن البطاقة بتاعتي سقطت قيد وأنا من مواليد باب الشعرية.
الناس الغريبة حنينين عليا عن ولادي
استكملت: عيالي محدش فيهم فكر يتواصل معايا خالص، الناس الغريبة حنينين عليا عن ولادي بكتير، نصيبي كده الحمد لله فيه ناس بتجبلي أكل برضه، وناس بتعطف عليا وتديني فلوس من 10 لـ 20 جنيه اليوم بيعدي.
وأضافت السيدة سمية أنها تعاني من ألم شديد في الظهر والقدمين، بقول لعيالي ربنا يسامحكم أنا مستهلش كل اللي حصل معايا ده، أنا كنت مدلعة عيالي جدًا بعد كده رموني في الشارع ومشفتهمش غير مرة واحدة بس بعد جوازهم.
