أصوات شعرية| عبد الرحمن الأبنودي.. مقتطفات من حياة الخال وشعره

عبد الرحمن الأبنودي، شاعر العامية المصري الذي أخلف ظنون من يقولون إن العامية لا تصلح للشعر، صاحب السيرة الهلالية، وناعت أيامه في مصر بالأيام الحلوة. 

يعد عبد الرحمن الأبنودي من أهم الشعراء الذين كتبوا العامية واستطاعوا توظيفها شعرًا يليق بحالهم وواقع الحياة الذي يعيشونها، وبزغ ضوؤه بأبياتٍ على رغم بساطتها فإنها كانت تعبر عن معانٍ جميلة وقيم عظيمة، وهو من مواليد مدينة أبنود بمحافظة قنا عام 1938.

جوابات جراحي القط والزحمة.. أبرز دواوين عبد الرحمن الأبنودي

تميز شعر الأبنودي بالخفة والعذوبة، كتب عن حياته في الصعيد بكل تفاصيلها ولم يخجل، وصف الأرض ومصر والطينة، وسخر من الحياة في أحيانٍ كثيرة، إضافة إلى أن خبرته الحياتية أكسبته قوة يواجه بها الأعباء ويجسدها ويوظفها بين حروفه وأشطر القصائد والأبيات.

أصوات شعرية.. أحمد محرم شاعر الإلياذة الإسلامية

أصوات شعرية| علي الجارم.. كيف تكتب الشعر بخفة ورصانة في آن واحد

وعبّر شعر الأبنودي في بعض الأحيان عن شخصيته، وعبر عن غموضه الشديد ووضوحه النبيل، وجمع بين المكر والشهامة، والثقافة والبساطة، وكتب في شتى الموضوعات واحتفظ برأيه في بعضها، وتعد من أشهر أعماله: جوابات جراحي القط، وديوان أنا والناس، وديوان أنا المصري، وديوان الأرض والعيال، وديوان صمت الجرس، وديوان الزحمة، وكتاب السيرة الهلالية، وغيرها من الأعمال التي بقت شاهدة على أثره المضيء في تاريخ الشعر المصري.

أوعى تعيش يوم واحد بعد عيالك.. قصيدة للخال تروي قصة الحياة

والله وشبت يا عبد الرُّحمان..
عجّزت يا واد.؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف.!
هلكوك النسوان؟
شفتك مرة في التلفزيون
ومرة.. وروني صورتك في الجورنان
قلت: كبر عبد الرحمن.!
أمال أنا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان.
عشت كتير.
عشت لحد ماشفتك عجّزت يا عبد الرحمان.
وقالولي قال خَلَّفت
وانت عجوز خلَّفت يا اخوي؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمان.
أهو عشنا وطلنا منك بصة وشمة.
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي.. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي: آية ونور.
ماعارفشي تجيب لك حتة واد؟
والاّ أقولك:
يعني اللي جبناهم..
نفعونا في الدنيا بإيه؟
غيرشي الانسان مغرور.!!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت.. افتح.
أو ماينادي عليك.. إجلح.
إنت الكسبان.
إوعى تحسبها حساب.!!
بلا واد.. بلا بت..
ده زمن يوم مايصدق.. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!
يو…..ه يا رمان..
مشوار طولان
واللي يطوِّله يوم عن يومه يا حبيبي.. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ؟
لكن فين شفتوني ؟
كنتوا عيال.!!
بناتي رضية ونجية ماتوا وراحوا
وأنا اللي قعدت.
طيِّب يا زمان..!!

إوعى تعيش يوم واحد بعد عيالك
إوعى يا عبد الرحمان.
في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.
ساعتها بس..
حاتعرف إيه هوّه الموت.!
أول مايجي لك.. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.
زي الحداية..
تخوي ع الحاجة.. وتطير.
من صغرك بضوافر واعرة.. ومناقير.
بس ماكنتش كداب.
وآديني استنيت في الدنيا
لما شعرك شاب.
قِدِم البيت.
اتهدت قبله بيوت وبيوت.
وأصيل هوه..
مستنيني لما أموت!
حاتيجي العيد الجاي؟
وإذا جيت
حاتجيني لجاي؟
وحتشرب مع يامنة الشاي ؟
حاجي ياعمة وجيت..
لا لقيت يامنة ولا البيت!