حمادة هلال: الشيطان دخل بين نصر محروس وبهاء سلطان والأمور صفيت
طرحت المذيعة أسما إبراهيم، سؤالا على الفنان حمادة هلال، خلال الجزء الأول من حلقة برنامج حبر سري المذاع عبر قناة القاهرة والناس، وجاء على النحو التالي: إيه رأيك ففي الأزمة اللي كانت بين بهاء سلطان ونصر محروس ولو كنت بمكان بهاء هتتصرف إزاي؟
رد الفنان حمادة هلال قائلا: أنا هحط نفسي كـ منتج، أنا راجل أنتجت وعارف يعني إيه إنتاج، ولكن أنا مش هاجي على بهاء، أنا كنت لسة بقول في الكواليس إن من الأصوات اللي بحب أسمعها شيرين وبهاء سلطان، وبهاء أطيب إنسان شوفته في حياتي.. العند بيولد الكفر، بس أنا واثق إن نصر محروس عنده حق في حاجات وبهاء أيضا بعد الفترة دي بقى ليه عنده حق في حاجات.
وتابع حمادة هلال: بس لما تلاقي الأمور صفيت يبقى الموضوع كان عند، هو فعلا كان شيطان بينهم.. نصر عمل حاجة كويسة جدا لـ بهاء سلطان في حياته، ونصر كان من الناس اللي حطت بهاء على السلم، وساعات في لحظة تيجي على المطرب يلاقي في ناس اتلمت حواليه ويبدأوا يخلوه مش حاسس بقيمة الشخص اللي كان واقف معاك، زي ما حصل معايا.
وأضاف: لو أنا شايف إن الأزمة كانت بالشكل ده وبهاء حاول يوصل لـ نصر، والأخير موافقش على التصالح بالطريقة دي، أنا شايف طبعا أن هنا في إفتراء من نصر، ولو أنا شايف إن بهاء بقى يسمع كلام من الناس دي ويبعد عن نصر وميجيش ولا يحضر استوديو وده بناء على كلام نصر، فأنا طبيعي كـ منتج هقول: أنت بتعاندني؟ طب خلاص مش هخليك تغني.
واستكمل حمادة هلال حديثه: الموضوع كله داخل في شيطنة، هتقوليلي مين اللي مظلوم؟ بهاء سمح لنفسه إنه يعدي من عمره 15 سنة بس ربنا هيعوضه وهيكرمه، وبالنسبة لـ نصر دي فلوسه وحاسس إنه عمل كيان كان هو السبب فيه، أنا شايف إن الاثنين كانوا يقدروا يلموا القصة دي، والأغنية اللي شايفينها النهاردة دي كان ممكن نشوفها من 12 سنة.
واختتم حمادة هلال قائلا: والله العظيم بهاء سلطان أكثر مطرب أنا أحب أسمعه وأذكره بالخير لأني مشوفتش منه غير كل خير، من طيبة قلبه.
