ناهد السباعي: هدى سلطان احترمت كل مراحل حياتها.. ولم يكن الحجاب عائقًا في أعمالها
بدأت منذ قليل، ندوة توقيع عشر نساء في واحدة، عن الراحلة هدى سلطان، للناقد كمال رمزي، ضمن فعاليات الدورة الحادية عشرة من مهرجان الأقصر للسينما الأفريقية.
وقالت ناهد السباعي خلال الندوة، المقامة الآن بقاعة رع: جدتي احترمت كل مرحلة عدت بيها مكبرتش في السن وبقت أدوارها أقل، أنا عايزة أفضل في المرحلة اللي أنا فيها وشايفة ان الفترة دي عندي فرص كتير، مكنتش موجودة قدام، وهي كسرت القاعدة دي، حتى خارج مصر بنلاقي الفنانين بيكتئبوا ويكونوا مش عايزين يشتغلوا.
هدى سلطان
وتابعت ناهد السباعي: هي بتقدر تغير صوتها في كل أغنية، نادرا لما بنلاقي حد بيجيد الاتنين، عمري ما حسيت إنها محجبة على المسرح أو بتمثل، عمرها ما اعتزلت وكانت مؤمنة جدًا باللي هي بتعمله، وعمره ما كان عائق قدامها، في ناس غيرها اعتزلوا ومقدروش.
وأشارت ناهد السباعي إلى أن هدى سلطان، عندما سُئلت في يوم ما هل ستعتزل الفن؟، أجابت قائلة: أنا هعتزل ليه منا بعملش حاجة حرام، لإنها كانت مؤمنة بما تقدمه.
ندوة تكريم هدى سلطان
وأضافت ناهد السباعي: جدتي كانت بتحب الفن وتقدسه، مضيفة: التمثيل إنك لما تمثل تحس إنك مبتمثلش وتعيش الحاجة، أنا بحب الحاجة دي فيها ويارب أكون ربعها.
وكانت أعربت ناهد السباعي عن سعادتها بكتاب عشر نساء في واحدة، حيث قالت في تصريحاتها لـ القاهرة 24: أنا النهاردة شوفت كتاب بعنوان 10 نساء في سيدة واحدة، وهي فعلا دي جدتي هدى سلطان اللي قدمت أدوار كتير مميزة.
