حسين فهمي: عندنا إمكانيات نعمل مهرجانات دولية ولكن بنصارع عشان ناخد ميزانية تكفي
تحدث الفنان حسين فهمي، عن الميزانيات المتعلقة بالهرجانات السينمائية، خاصة وأنه كان مدير مهرجان القاهرة السينمائي الدولي لمدة 4 دورات في الفترة من 1998 لـ 2001، واستطاع خلال هذه الفترة إحداث تغيير ملحوظ في المهرجان وكان أبرزها في الحضور.
وقال الفنان حسين فهمي في تصريح لـ القاهرة 24: إحنا عندنا كل الإمكانيات نعمل مهرجانات دولية على درجة أولى، إنما المشكلة دايما في الميزانية، يعني لما تلاقي إن مهرجان Cannes ميزانيته 50 مليون يورو، 50 مليون يورو، جايين منين؟ جايين من وزارة السياحة، ووزارة الثقافة، ووزارة الخارجية، واتحاد المطاعم، والمطار، واتحاد رابطة سائقين التاكسي لأنهم شايفين إن المدينة بتنتعش، كل واحد في المدينة بيشارك، كل واحد بنشاط معين بيعمل ميزانية، مثلا شركة سيارات بتدي لهم عربيات، فـ الميزانية بتوصل لـ 50 مليون يورو وده شيء رائع.
وتابع الفنان حسين فهمي: إحنا في أي مهرجان من المهرجانات بنصارع عشان ناخد ميزانية تكفي تقدم مميزات وتقدر تسكن ضيوفك في فنادق كويسة وتقعدهم فترات أطول، كل ده بيبقى ليه مجهود، يعني أنا في مهرجان القاهرة السينمائي لما جبت بيتر أوتول، جت 3 شركات تليفزيون إنجليزي زي BBC، sky news، عشان بيتر أوتول موجود في مصر.
وأضاف فهمي: ولما جت صوفيا لورين، جت 5 شركات إيطالية، ولما جه آلان ديلون، جت كل الشركان الفرنساوي، أنت لما بتبقى موجود في مهرجان وبتجيب نجوم بيجي معاهم شركات، كل الشركات دي جاية بتضيف على المهرجان، إحنا دائما مشكلتنا الميزانية، اعمل ميزانية قوية هتلاقي مهرجان قوي.
مؤتمر حسين فهمي على طريق الكباش
وفي سياق متصل، أكد الفنان حسين فهمي، خلال المؤتمر الصحفي الخاص به الذي أقيم أمس على طريق الكباش أنه من الممكن أن يصنع مهرجان سينمائي في أي مكان في العالم، بشرط أن نفكر خارج الصندوق: والمهرجان يجب أن يكون فيها شكل، زي مهرجان كوميدي، مهرجان رعب، وواحد صاحبي قالي عايز أعمال مهرجان سينما في الغردقة، قولت له لا، الغردقة، مينفعش فيها مهرجان سينما، أصلا في مهرجان في الجونة، فقولت له أعمال مهرجان سباق للمراكب، زي بره.
وأضاف الفنان حسين فهمي: لازم نفكر خارج الصندوق، ممكن يبقا في طنطا في مهرجان، أو بنها، أو أسيوط، بس مش ضروري أن الأفلام زي بعضها، إحنا لازم نفكر ونعمل مهرجانات، والمهرجانات لازم تكتر، لأن السينما عالم تاني خالص عالم جميل رائع.
