عمرو أديب عن ارتفاع الأسعار: لسه الغلا بتاع الحرب مجاش
علق الإعلامي عمرو أديب، على موجة الغلاء وارتفاع الأسعار في السلع الغذائية جراء الحروب الروسية الأوكرانية، لافتا إلى أن الزيادات الحالية ليست زيادات ناتجة عن هذه الأزمة، متابعًا: "الغلاء اللي شايفينه دلوقتي ملوش علاقة بالحرب، لسه الغلا بتاع الحرب جاي".
هل علبة اللبن اللي زادت النهاردة بعد ما الحرب تخلص هتنزل تاني؟
وأضاف أديب، خلال برنامجه الحكاية"، مساء اليوم الإثنين: "قبل ما أقول للدولة خفضي وأعملي تسهيلات؛ هل علبة اللبن اللي زادت النهاردة بعد ما الحرب تخلص هتنزل تاني؟ كيلو المكرونة السايبة زادت 3 جنيه هل هتنزل تاني؟"، متابعًا: "لو الأسعار مش هينزل تاني أقول ليه للدولة قللي أو اعملي واحنا عارفين في مصر أن اللي بيطلع مش بينزل".
وأكمل الإعلامي عمرو أديب: "لو في حاجة واحدة بس الدولة تعملها بس تحل المشكلة، اضرب الاحتكار وده دور الدولة بالقانون، مينفعش اتنين أو ثلاتة يتحكموا في سعر سلعة".
السلوكيات الشرائية الخاطئة في ظل الارتفاع في أسعار السلع
وانتقد الإعلامي عمرو أديب بعض السلوكيات الشرائية الخاطئة في ظل الارتفاع في أسعار السلع الغذائية، متابعًا: "بقالي يومين تلاتة بحاول أشوف الغلاء العالمي؛ العالم دة بيعملوا أيه؟ هو مواطن زيه زيك عنده غلاء في الغاز هناك الناس لأن معندهاش اعتمادية أوي على الدولة فاهمين أن السوق كدة وبيتحرك كده".
وأضاف: "ده مش وقت بيض أورجانيك، ماله البيض العادي، كله بالبسطرمة بيبقى حلو، عملوا استطلاع للأمريكان في أمريكا قالولهم أنتوا متخيلين الأسعار زايدة ليه؟ أغلبهم قالوا السبب جشع وطمع الشركات الكبرى أن الزيادات اللي عملاها الشركات لا تتناسب مع الزيادات الناتجة عن الحرب".
