عبير صبري تطالب بإلغاء مجانية التعليم: المفروض اللي يصل الجامعة المتفوقين فقط واللي هيفيدوا البلد
كشفت الفنانة عبير صبري، سبب عدم قيامها بتقديم أدوار البطولة المطلقة، قائلة: أنا البطلة حتى في وجود البطلة.
وأضافت خلال لقاء تلفزيوني لها: الخطوة دي ممكن تحصل في يوم وليلة إذا جد التمويل، لأن الموضوع بيتم بشكل مهني ليس له علاقة بالممثل، وفي جزء كسل من عندي، مضيفة: قدمت ستات قادرة كان بطولتي وألوان الطيف لكن ده بيضطرني أتوقف فترة لما ادور على مشروع تاني، وفي النهاية الممويل هو اللي بيخلي نفسه بطل.
وعن سبب تقديمها العديد من أدوار الشر قالت: الشرير شخص ما حكاش حكايته الطيب حكى حكايته لكن الشرير ما تعرفيش حكايته إيه وصل لإيه وازاي، وأنا بتعاطف مع كل الشخصيات اللي بلعبها واحبها واتعرف عليها وليه عملت كده هي بتشوف نفسها مش غلطانة وبيكون عندها تبريرات وعلى الممثل أن يفهم سيكلوجية الشخصية اللي بيقدمها ويديها حاجات من روحه، الناس تعاطفت مع الشخصية اللي قدمتها في خيانة عهد علشان أنا صدقتها وأديتها مبررات.
أطالب بإلغاء مجانية التعليم
وفي سياق آخر، طالبت عبير صبري، ضرورة إلغاء مجانية التعليم، قائلة: اقترح إلغاء التعليم المجاني أو يتقنن زي الدول الأخرى، وأن يصل للجامعة المتفوقين فقط، واللي هيفيد البلد ويستحق الفلوس اللي بتدفع له من خزينة الدولة والضرائب.
وأضافت: أنا عايزة التعليم الفني والصناعي يتم احترامه وابتكار أفكار جديدة له والصورة النمطية بتاعت الستينيات لازم تتلغي وأن الناس كلها لازم تتعلم وطبعا لازم كله يتعلم بس تعليم يليق بظروفه وميوله مثل التعليم الصناعي والفني واليدوي وهيطلع شيء عظيم ومنتج وهيفيد البلد ونفسه ويجيب فلوس، بدل ما تروح وتيجي من الجامعة والحكومة تقول لك ماعنديش مكان ليكي أو أقعدي على مكتب وخدي مرتب على حاجة مش بتعملها ولازم نفكر في أفكار المتوارثة القديمة واللي مابقتش ماشية مع عصرنا.
من ناحية أخرى، تنتظر عبير صبري طرح مسلسل يوتيرن، الذي تشارك من خلاله في المارثون الرمضاني المقبل 2022، والذي يناقش قضايا اجتماعية مهمة، ويجسد توفيق عبد الحميد دور والد ريهام عبد الغفور، ويدعى حاتم الكردي، يجمع العمل العديد من النجوم أبرزهم، نانسي صلاح، هلا السعيد، نورهان، وعددا آخر من الفنانين، وهو من تأليف أيمن سلامة وإخراج سامح عبد العزيز.
