مستخدمو السوشيال ميديا يهاجمون قارئ شهير بسبب تعنيف أحد السميعة.. والأول يرد: مسكني بطريقة وحشة
هاجم مستخدمو مواقع التواصل الاجتماعي الشيخ محمد علي الطاروطي، قارئ القرآن المشهور، بعد تعنيفه لأحد الأشخاص خلال مناسبة عزاء، حيث طلب منه أحد الحضور إعادة قراءة سورة الفاتحة مرة أخرى، غير أن الطاروطي رفض ذلك.
ويظهر في الفيديو المتداول قيام أحد الأشخاص الموجودين في العزاء وتوجه نحو القارئ الطاروطي، حيث طلب منه بعد أن أنهى تلاوته، أن يعيد قراءة سورة الفاتحة وظل يكرر الطلب مرات عديدة، كما ظهر وهو يمسك بالطاروطي محاولا أن يجبره على إعادة قراءة الفاتحة.
كسر خاطر
وقال مستخدمي التواصل الاجتماعي، إن الطاروطي كان عليه أن يجبر بخاطر ذلك الرجل وألا يحرجه أمام الحضور.
من جانبه، رد الطاروطي على تلك الانتقادات، قائلا: خلال اليومين اللي فاتوا وجدت كثير من الأحباب كاتبين عن كسر الخاطر، وأنه كان يجب عليا ألا أكسر بخاطر ذلك الرجل، مضيفًا: عملية جبر الخاطر تكون وسط القراءة يعني لو حد طلب منك تعيد الآية أو ترجع آيتين لورا، وهذا عادي جدا.
وتابع الطاروطي خلال مقطع فيديو على صفحته بموقع التواصل الاجتماعي: في نفس الليلة جالي صاحب الليلة وخلاني أرجع الربع من تاني وليس آية فقط، ودا مفيهوش مشكلة ورجعت عادي، متابعا: لكن ما حدث في آخر دقيقة إن هذا الشخص جالس أمامي وعارف إني تعبت من البرد والجور كان بيمطر، المفروض كان قبل ما أختم يقوم يطلب مني اللي عايزه، مش بعد ما أصدق.
قولت لهم يا جماعة حوشه عني
وأكمل الطاروطي: هو مسكني بطريقة مش كويسة، وكان بيشدني من رقبتي وصوابعه في صدري، أنا حسيت إن الحالة مش مظبوطة وفي حاجة، وحبيت أعبر عن غصبي بسرعة، وقولت لهم يا جماعة حوشه عني؛ لأني حسيت إن الماسكة مش طبيعية، ودا اللي خلاني أقول والله ما هقرأها.
القارئ بيكلم ربنا وأنا خلصت كلامي مع ربنا وانتهيت
وأردف الطاروطي: حلفاني كان احتراما للقرآن،؛ لأني خلصت، وبعدين مش أي شخص يحكم على القارئ الجالس على الدكة، القارئ بيكلم ربنا وأنا خلصت كلامي مع ربنا وانتهيت، ومينفعش ترجعني تاني وأنا كنت بدعي، وكمان أصحاب العزاء قالوا إنه ليس من عندهم ولا يعرفونه، وأنا اللي زعلني إنه شدني كدا قدام الناس، وهذا أول موقف يحدث لي بالشكل ده.
واختتم: أنا مش عايز ابقى تريند ولا الكلام دا، وأنا الحقيقة زعلت، وأقول اللي عايز ينتقد يرد نقد بناء، ولو في خطأ بعتذر.
