قصائد رمضانية.. فوانيس شوارعنا لـ سعيد شحاتة

سعيد شحاتة أحد أبرز شعراء العامية في الوقت الحالي، وهو عضو مجلس إدارة اتحاد كتاب مصر، وصدر له عدد من الدواوين، منها ديوان حاجات يامهن وديوان حلمت بيه، وديوان طرح النهار على نخل فبراير، وهذه قصيدة له بمناسية حلول شهر رمضان المبارك.

قصيدة فوانيس شوارعنا

فوانيس شوارعنا بتضحك لي 
رمضان داخل لابس شكلي 
قدّمت حلولي على مشاكلي 
مشّيت ع الخلق الكاس بالدور 
بالحق بنشهد مش بالزور 
رمضان بيخطي بيبان الدور 
داخل منصور 
بيطبطب ع القلب المكسور
أنا وانت سحور 
وقزاز بنور 
وطبق على بيت الناس بيدور 
وسنين وشهور 
وعيال وطيور 
رمضان داخل بهدومه النور 
وبقلبه المليان خير وإيمان 
خبّط على باب الله وافرح
وانزل من فوق 
والبس إنسان 
قلبك بركان بيقوم ويهيج 
لما بيتعبى وجع وضجيج 
العمر ما عادش يساع تهريج 
ولا عاد يستوعب حد جبان

رمضان بيخبط ع الجدران 
سحّر روحك حبّ وإحسان 
هتعيش لو كل العالم هان 
وهتطعم كل يتيم وجعان

إنسان/ كروان/ حنّان/ منّان
-سماوات ربنا مليانه بيبان-
والقمر الساكن فيك بيبان 
لو حسيت بيك في عيون رمضان

هنزيد في الحمد كمان وكمان 
نحمد ربنا كمّلنا علام 
التايه مش هامّه السلطان 
والسلطان تايه من ميت عام 
وحّدنا الصف على الصلبان 
ووقفنا بقلب الدنيا الخام 
بنعين على راس كل المتعان 
ونسمي على الشخص المنضام

الدنيا بتتوضى ف زمزم
والسما بتقول اعرف والزم 
العارف مش ممكن يُهزم 
والمهزوم مش ممكن يتقام

احمد ربنا ع اللي ف إيدك 
ربك من خير بكره يزيدك 
وهيديك من بير مواجيدك 
ويعزز بالنسل الإسلام

أنوار الله ماليه الحاره 
والجاره بتهمس للجاره 
رمضان جاي راكب طياره 
ويمام ع السور بيعشّي يمام

يا إمام الجامع قوم صلّي 
السجاد بيكم متحلّي 
حلّينا الكيس يا سنين حلّي 
وتعالي نقف م الليله قيام

أيام العام كوم وانتم كوم 
لابسينكم على أوجاعنا هدوم 
تايبين يا كريم من أول يوم 
ونوينا نصوم وبدأنا صيام

حلي لنا الكيس يا ام الأجاويد 
الطيب يدخل بيته يقيد
نواره ونورك لبسه جديد 
وحبايبك واقفين لك قدام

رمضانكم طيّب يا اهل الله 
اللي معاه مال غير اللي معاه 
أحلام ويقين وعشم ف سماه
وعنيه مليانه حياه وسلام

فوانيس شوارعنا بتضحك لي 
رمضان داخل لابس شكلي 
شايل في إيديه لبسي واكلي
أيتام وف رمضان مش أيتام

سعيد شحاتة: اتحاد الكتاب يسعى لضخ دماء جديدة من الشباب.. والعضوية متاحة للجميع