تشويه الشيوخ لا بد أن يتوقف.. أمير طعيمة: صناع الدراما يجب أن يرجعوا لمتخصصين في المسائل الدينية
علق الشاعر أمير طعيمة على بعض الكُتّاب وصناع الدراما الذين لا يستعينون بمصادر رئيسية في أعمالهم الفنية.
وقال طعيمة في منشور على صفحته الشخصية بموقع التواصل الاجتماعى فيسبوك: " لما بتعمل فيلم عن حرب الاستنزاف أو حرب أكتوبر فأنت ملزم بأنك تستعين بالمؤسسة العسكرية، لأن مهما كانت معلوماتك استحالة تكون على نفس قدر المعلومات اللي عندهم.
وأضاف طعيمة قائلًا: “ لو بتعمل عمل عن المخابرات أو القضاء أو الشرطة أو أي مهنة فانت بتحتاج جلسات مطولة مع واحد واتنين وتلاتة عشان انت مش هتبقى عارف زيهم، وده نفس الأمر بالنسبة للمسائل الدينية انت ملزم دينيا وأخلاقيا بالرجوع للكنيسة لو أمر يخص المسيحيين ولمؤسسة الأزهر لو أمر يخص المسلمين، ومهما كانت ثقافتك والكتب اللي قرأتها دي أكيد نقطة في بحر الكتب اللي قرأها علماء دي شغلتهم”.
وتابع قائلًا: ونقطة إن الكلمة الفلانية مش موجودة في القرآن ده تبسيط وسطحية مبالغ فيها، الكوكايين والهيرويين والمخدرات عموما مش مذكورة لفظا في القرآن فهل معنى كده إننا نبني أحكام على عدم ذكرها صراحة، تفسير وتأويل الآيات واستنباط الاحكام منها ومن السنة الصحيحة مش عمل فردي تقوم بيه بطولك بالبساطة دي، ولو مش خايف على دينك فارجع برضه للأزهر عشان تعمل عمل مظبوط يفيد الناس".
أمير طعيمة: تصوير الشيوخ على أنهم جهلاء أمر يجب أن يتوقف
وأشار: “حاجة أخيرة تصوير الشيوخ طول الوقت على انهم يا إما جهلاء يا إما متطرفين وفي أفضل الأحوال انتهازيين ده أمر يجب أن يتوقف، وهتقولي فيه منهم كده هقولك صح، بس تصويرك الدائم ليهم بهذه الصورة بيحول الاستثناء إلى تعميم وبيخلي أجيال تطلع عندها صورة ذهنية عن الشيخ إنه حتما كائن ضال مضل وده ما يرضيش ربنا، انت حر فيما تؤمن بيه وهتتحاسب عليه، بس لحظة ما هتصدر الأفكار دي لغيرك فانت ملزم باتخاذ أقصى درجات الدقة والتحري قبل ما تنشرها بين الناس”.
وكان قد أثار الكاتب إبراهيم عيسي مؤخرًا مؤلف مسلسل فاتن أمل حربي، الجدل بسبب عدم الاستعانة بآيات قرآنية تؤكد رسالته عن المسلسل، مكتفيًا ببعض أراء الفقهاء والمفكرين.
