عمرو أديب: فيه دواء ارتفع سعره لـ 50% ولازم نلاقي حلول لارتفاع الأسعار
علق الإعلامي عمرو أديب، على ارتفاع أسعار الدواء، إذ شهد سوق الدواء زيادة مؤخرًا في عدد من الأصناف، قائلًا: لازم الدولة تقعد مع المصنعين علشان تظبط الأسعار.
فيه غلاء في العالم
وأضاف الإعلامي عمرو أديب: فيه غلاء في العالم وغلاء في البلد.. واللحوم زادت والفراخ كمان والدولار زاد اليوم في البنك.. بس المواطن المصري يهمه الدواء ومسألة هامة عند المصريين.
لازم الدواء يكون متوفر
وتابع الإعلامي عمرو أديب: فيه ناس عندها أمراض مزمنة ولازم الدواء يكون متوفر وبسعر معقول.. الدواء غلي على الناس.. فيه أدوية بتزيد من 15% إلى 50%، وضروري جدًا نلاقي حلول في القصة دي.. وأن تجلس الدولة مع مصانع الدواء المصري والأمر يحتمل أن يكون هناك لقاء لمعرفة ارتفاع الأسعار.
وأكمل أديب: الدول كلها دلوقتي بتعمل حاجة وهي تبريد ارتفاع الأسعار ومحدش قدر يوقف موجة الغلاء اللي حصلت في العالم، الأسعار محدش قدر يتحكم فيها، ولكن الدولة بتتدخل لتبرد حرارة ونار ارتفاع الأسعار.
واستطرد أديب: فيه غلاء في ورق العنب ممكن المواطن يستغنى عنه خالص بس موضوع الدواء الملتزم بيه؟ يعمل فيه ايه ميقدرش ميخدوش.
