مظهر شاهين يهاجم سيناريست شهير: مش رجولة تقربع إزازة ميَّه وتولع سيجارة في نهار رمضان
هاجم الشيخ مظهر شاهين، الداعية الإسلامي، سيناريست مصري شهير؛ بعد تصريحاته حول واقعة السيدة المسيحية، ورفض أحد مطاعم الكشري الشهيرة تقديم الطعام لها إلا بعد أذان المغرب.
وكان السيناريست الشهير، قال في تصريحاته: إنه بعد واقعة منع سيدة مسيحية وطفلها من تناول الطعام قبل أذان المغرب في أحد محلات الكشري؛ قرر النزول للشارع، ودخن سيجارة، وشرب معها زجاجة مياه؛ حتى يرى هل هناك من سيعترض عليه أم لا؛ استعداد للهجوم على كل من يعترض.
وقال مظهر شاهين، خلال مقطع فيديو له عبر قناته على يوتيوب: النهاردة لقيت وسائل التواصل الاجتماعي مقلوبة على حد بيقال إنه كاتب، وأنا جلست أقرأ عنه وأشوف هو كاتب في إيه؛ فوجدت إنه بيكتب أفلام وأمور زي كده، لكنه يتصرف تصرف أراه غبيًّا جدًا، وليس له علاقة بأي شيء خالص.
موقفك مش رجولة ولا وطنية
وتابع مظهر شاهين موجها حديثه للسيناريست: لو أنت عايز تحسب الموقف إنه رجولة أو تحمله على الشهامة أو إنك رجل وطني أو رجل متدين؛ الحقيقة هو مش محمول على أي شيء خالص، لكن هو تصرف أحمق وتصرف تافه.
واستطرد مظهر شاهين: نحن لا نقبل على الإطلاق أي تفرقة على أساس ديني أو عنصري أو طبقي في مصر؛ عشان محدش ياخد الكلام في سكة تانية، متابعا: أنا معروف عني جدا إني من الناس اللي بيحبوا أخواتنا المسيحيين في مصر، ومش عايز أتكلم على علاقتي بيهم، ولا حد يزايد على كلامي، وأنا طالبت في وقت من الأوقات، إنه يتم حذف خانة الديانة من البطاقة الشخصية؛ عشان ماتبقاش في تفرقة.
وأكمل مظهر شاهين: لذا أستنكر منع أو امتناع مطعم مصري عن تقديم الطعام للأخوة المسيحيين في رمضان أو غير رمضان، وهناك أخوة مسيحيين بيمتنعوا عن الأكل؛ احتراما لمشاعر أخوتهم المسلمين.
وقال مظهر شاهين: الرجولة مش إنك تقربع إزازة ميَّه وتشرب سيجارة في نهار رمضان يا برنس، مضيفا: طيب دلوقت، لو مكان منع حد لابس لبس قصير؛ هل هتلبس لبس قصير وهتنزل يعني تضامنًا مع اللي لابسه؟، أو مكان منع شرب الخمر؛ هل هتنزل وتشرب خمر يعني؛ عشان تبين إنك متضامن؟.
