هو إحنا حشرات.. حمو بيكا ينهار من البكاء: بحسبن على أي حد بيمنع لقمة عيشي | فيديو
دخل مطربا المهرجانات حمو بيكا وحسن شاكوس في نوبة بكاء بعد سؤالهما عن: ماذا سيكون رد فعلهما إذا ما تم منعهما من الغناء خارج مصر أيضًا، وذلك خلال لقائهما في برنامج حبر سري الذي تقدمه الإعلامية أسما إبراهيم.
وقال حسن شاكوش: لو امتنعت عن الغناء بره مصر، وقتها هحسبن، أنا أي حد بيمنع لقمة عيشي برفع إيدي وبحسبن فيه إن ربنا يجبلي حقي، هما شايفني إيه هو إحنا حشرات.
ووجّه رسالة حمو بيكا لنقيب المهن الموسيقيين الفنان هاني شاكر، قائلًا: أنا يا أستاذ هاني بشر، بني آدمين، وربنا مش هيسيب حقي، الغنا ده حياتنا ومعندناش أي دخل، إحنا طول عمري كنا بسمعك من وإحنا صغيرين، وحضرتك صوت مهم، وعلى دماغنا لكن حضرتك بتتنمر عليا.
تصريحات حمو بيكا
وتابع حمو بيكا: حضرتك كنت في ندوة واتنمرت عليا، كفاية تجرحوا فينا.. أنت مش عجبك فني في ناس تانية عجبها فني، أنا في السعودية حضر لي 30 ألف متفرج، هل دول مش بيسمعوا.. أنا موجوع تعبان، كفاية بقا تنمر.
وواصل حمو بيكا: مش هعيش لو اتمنعت من الغناء هموت.. عشان معنديش حاجة أبكي عليها.. 5 سنين.. أنت عندك ربنا يسهلك ويرزقك.. أنا أبويا كان على باب الله ومعنديش فلوس.. عملت عمرتين ودعيت عليهم.. أنا عايش ميت، أنت عندك قصور وفيلا إحنا غلابه أنا بشتكي ربنا.. أنت عيشت وكلت وشربت إحنا بنحاول نعيش شوية.. حرام علينا أننا نعيش أنت بتقول لو بإيدي كنت منعت، هو أنت ربنا! ربنا مش بيقول كده، أنت هتتحاسب عليا.. الدنيا دي مش دايمة للبشر.
واختتم حمو بيكا حديثه: أنا مش عايز منه حاجة، بترفع عليا قضية! أنا عايش زي الميت.. خمس سنين وربنا كان في ضهري ويقولي خد عشان هما يبصولي! هو لا في أيدي ولا في أيدك وأنا مش مسامح لحد يوم الدين.. ولا في حياتي عمري ما هسامحهم.
