أحمد فلوكس: كنت من أسوأ الناس وعملت كل الموبِقات ولكن مش على الشاشة
عبّر الفنان أحمد فلوكس، عن رأيه في المهرجانات الشعبية، وتطرق للحديث عن العديد من الجوانب في حياته الشخصية، خلال استضافته ببرنامج حبر سري، الذي تقدمه الإعلامية أسما إبراهيم، عبر شاشة قناة القاهرة والناس.
وقال أحمد فلوكس: بسمع مهرجانات وبحبها جدًا ومسألة الألفاظ موجودة في الأغاني الشعبية منهم شكوكو وأحمد عدوية والشعب فئات، ولو حد عاجبني ولكن بيقول كلام مش حلو هاخده أقومه وأظبطه ما دام له جمهور مش وظيفتنا إننا نمنع وبكلمك متخصص في مهنة ودارس، وفيه ناس هاجمتني لما أبويا عمل دور الراقصة والسياسي.
وأضاف: الدراما بتشكل وجدان أطفال وشباب ومجتمع، ما أنا كده كده بتهاجم من الناس عشان بقول الحق، ما أنا كنت بغلط وكنت من أسوأ الناس اللي في الدنيا وعملت كل الموبِقات ولكن مش على الشاشة وكنت مراية لنفسي وصريح مع نفسي وقعدت طلبت من ربنا الغفران والسماح بس في الآخر مطلعتوش على الشاشة والحمد لله حتى الفيلم اللي عملته مع صوفينار ومحمود الليثي مكنش فيه اللي كان في الأفلام التانية.
زيجات أحمد فلوكس
وأشار أحمد فلوكس إلى أن علاقاته العاطفية ليست متعددة ومتخطية رقم 25 زيجة مثلما انتشر خلال الفترة الماضية، ولكن يكمنوا في 5 زيجات فقط، منهم مرتين عُرفي وكانت إحداهما بعد انفصاله عن الفنانة هنا شيحة.
