ليلى غفران: دخولي في غيبوبة وإصابتي بجلطة وشلل كامل هو سبب ابتعادي عن الفن
كشفت الفنانة ليلى غفران سبب غيابها عن الساحة الفنية الفترة الماضية التي طالت لسنوات عديدة، موضحةً أن المرض وتغير الوسط الفني من الأسباب الأساسية التي أبعدتها.
وقالت ليلى غفران في تصريحات تليفزيونية: كنت غايبة عشان شوية ظروف متعبة، غير إن الوسط اتغير وبقى غريب عليا، وبعدين لما تكوني حاسة انتي في غيبوبة وفيه حاجة حصلت وديتني في عالم تاني خالص وتصحي تلاقي نفسك بعدتي كتير.
وأردفت غفران بـ: كنت في غيبوبة مرضية، وحصلي جلطة في المخ سببتلي شلل كامل، وعانيت كتير والحمد لله، وفوقت من الغيبوبة كأن ربنا بيقولي فوقي، وابتديت أشتغل وأعمل شوية حاجات.
وأضافت ليلى غفران: الجلطة في المخ جات من أكتر من حاجة صعبة في حياتي، وكانت عبارة عن تراكمات من جوايا، وأنا من نوع الناس اللي مبعرفش أغضب وأطلع اللي جوايا، ودايمًا أكتم وأسامح أي حد بيسيء ليا، فحصل تراكمات لدرجة إني مرة واحدة حصلي غيبوبة فجأة، ودخلت المستشفى واتحجزت؛ لأني مبقيتش أقوم ولا أتحرك، وكنت بتعالج من الجلطة وبقيت حاسة كأني طفلة في الكلام وبتهيألي حاجات كتير من كمية الأدوية اللي كنت باخدها، وبقيت بشوف حاجات غريبة ورجعت طفلة وبقيت تاني كبيرة وأثرت معايا كتير أوي.
