أول تعليق من الحكم المعتدى عليه بالشيخ زايد: إحنا ولا حاجة وعاملونا زي المجرمين | خاص
حصل القاهرة 24 على نص رسالة محمد عبدالناصر، أحد حكام منطقة الجيزة، بعدما تم الاعتداء عليه خلال إدارته مباراة مركز شباب الوراق، ونظيره الفهميين، وذلك في دوري مراكز الشباب، بدور الـ 8 التي أجريت على ملعب الشيخ زايد.
وأرسل الحكم محمد عبدالناصر رسالة عبر الجروب الخاص بحكام منطقة الجيزة على واتس آب، والتي جاءت على النحو التالي:
رسالة الحكم المعتدى عليه
وقال عبدالناصر: أنا حابب أقول حاجة مهمة ولازم كل واحد من زمايلى في الجروب يعرفها ويفهمها، إحنا كحكام إحنا ولا حاجة عند المنظومة، لما يتم التعدي علينا من فريق كامل ونعمل محضر بالواقعة ومنلاقيش مخلوق من المنظومة جنبنا ولا يقف معانا، ونتعامل كمتهمين ونبات فى القسم ويتم ترحيلنا فى عربية الترحيلات وفى أيدينا الكلبشات زينا زي المجرمين.
وأضاف: أما مراتى وأمى يشوفونى وأنا متكلبش ونازل مع المجرمين. ويستغيثوا بالمسؤولين كل دة عشان ماتش كورة ووصلت النيابة قولت هلاقى أي حد يبقى واقف جنبنا ملاقيش واقف فى قفص الاتهام، بجانب أن لاقيت 7 محاميين واقفين مع لاعبى الوراق وكل من له علاقة بأى حد منهم كان موجود.
واختتم: أنا بكيت ومش مكسوف أنى بقول كدة لأنى لو لاقيت واحد بس كنت هحس بأمان اكتر ومكنتش اتنازلت، بس أنا اتنازلت علشان حاجة واحدة بس علشان أخرج من النيابة، لأنى شوفت مراتى متبهدلة قدام النيابة.
