أزهري عن واقعة فرد أمن المعادي: ناس كتير مداسة في شغلها وصابرين عشان لقمة العيش
علق الشيخ إسلام النواوي، أحد علماء الأزهر الشريف، على واقعة تعرض فرد أمن بكمبوند في المعادي للضرب والصفع والسحل، من قبل أحد الأشخاص أثناء تأدية عمله.
وقال العالم الأزهري عبر حسابه على موقع التواصل الاجتماعي فيس بوك: تابعت حادثة فرد الأمن اللي كان حارس على كمبوند في المعادي وأحد السكان اعتدى عليه بشكل مليان جبروت، أنا شوفت الفيديو والملفت في الفيديو إن الشاب بتاع الأمن ماحولش حتى يزق الراجل، والأخ التاني نازل على وشه بالأقلام ويشده من على الكرسي ويسحله على الأرض، طبعا فرد الأمن طلع وبرر عدم رده عليه بإنه من أصول ريفية وإنه حقه هايجيله.
خايف على وظيفته
وأضاف العالم الأزهري: لكن أنا عاوز اقولك هو ليه ماردش عليه ؛ لأنه خايف على وظيفته وخايف إنه يترفد منها لو حاول يرد عليه لأنه موظف غلبان في رقبته ناس بيصرف عليهم ومالوش ضهر أو سند من البشر والناس مش هاتصدقه وهايصدقه الشخص التاني وسبحان الله المكان يكون فيه كاميرا عشان ربنا ينصفه.
وأكمل العالم الأزهري: إنت عارف كام شخص مداس عليه في شغله بسبب لقمة العيش وصابر وساكت ومنهار ومش قادر يفتح بقه، إنت عارف كام واحد بيروح بيته مش طايق نفسه ومش قادر يتكلم عشان في حد معاه في شغله بيأذيه وهو مش عارف يجيب حقه.
إذا دعتك قدرتك على ظلم الناس فتذكر قدرة الله
واختتم العالم الأزهري: أنا ليا تعليق واحد، إذا دعتك قدرتك على ظلم الناس فتذكر قدرة الله، أجبروا خاطر بعض وماتأذوش الناس في أكل عيشها وكرامتها عشان الدنيا مش مستحملة.
الضرب والصفع والسحل
وتعرض فرد أمن بكمبوند في المعادي يدعى محمد. م، للضرب والصفع والسحل، من قبل أحد الأشخاص أثناء تأدية عمله، بعدما تفاجأ بوجود سيارة بها شخص يريد أن يدخل الكومبوند، دون أن يوضح رقم العقار المحدد أو الشخص الذي سيتوجه إليه بالداخل، الأمر الذي رفضه المجني عليه، تنفيذا للتعليمات من قبل شركة الأمن، لينهال عليه صاحب السيارة بالضرب دون أي رد فعل منه.
