ياسر جلال يرد على شائعة اعتزاله: هرجع أشتغل وأقدم أدوار متنوعة
رد الفنان ياسر جلال، على الأنباء التي تحدثت عن اعتزاله الفن، بعد تجسيده شخصية الرئيس عبد الفتاح السيسي، رئيس الجمهورية، في أحداث الجزء الثالث من مسلسل الاختيار، قائلا: أنا هقول اللي اتقلي، القائمين على المتحدة للخدمات الإعلامية، واللي بيديروها، قالولي مفيش حاجة اسمها الدور ده أخر المطاف، وأنك تقعد، أنت ممثل شاطر، فهتعمل أدوار كتيرة.
وأضاف جلال، خلال لقائه على راديو 9090: أنا هرجع أشتغل زي ما كنت بشتغل، خلال السنوات اللي فاتت، وهعمل أدوار متنوعة، إحنا بنتعامل مع ناس مثقفين جدًا ومتعلمين جدًا وفاهمين جدًا، إن ده فن، والرئيس فاهم دور الفن، وإذا كنت نجحت لازم أدعم نجاحي بأدوار أخرى.
وواصل: العمل الفني منتج يدخل البيت، عشان كدا براعي معايير المتلقي، وبلتزم بمعايير رقابية مؤسساتية ومجتمعية، خاصة أن مصر لديها جيش قوي، من قوة مصر الناعمة، وأنا طالما نجحت في دور معين أقدر أقدم الكوميدي والتراجيدي والأكشن.
وحول نبرة الصوت التي ظهر بها في مسلسل الاختيار، قال: كانت أصعب حاجة.. المشاهد كنت بسجلها صوت وأقعد أسمعها، وكنت ببقى خايف أعمل حاجة وتطلع غلط، وتدربت على تون الصوت، وأنا بعمل البروفة قولت بنفس تون الصوت، فمساعد الصوت قالي أنت جايب نفس تون الصوت، ولقيت المخرج متفاجئ، نافيا أن يكون الصوت دوبلاج.
