بسبب مشهد في مسلسل موسى.. أنوشكا توضح تفاصيل خلافها مع مخرج راجعين يا هوى
كشفت الفنانة الكبيرة انوشكا، عن تفاصيل خلافها مع محمد سلامة، مخرج مسلسلها راجعين يا هوى، الذي عرض خلال السباق الرمضاني 2022، وحقق نجاحا كبيرا منذ عرض أولى حلقاته.
وقالت انوشكا، خلال حوارها مع الإعلامية لميس الحديدي، في برنامجها كلمة أخيرة، المذاع عبر شاشة قناة ON: أنا كنت حابة التجربة ككل، وكل مشهد كنت بصوره كان في شد وجذب مع المخرج محمد سلامة، بس أنا بقولها أنا سعيدة جدًا إني اشتغلت معاك يا سلامة، حاسة إنه أضاف ليا رغم الخلافات.
وحول تفاصيل خلاف انوشكا مع المخرج محمد سلامة، قالت: أنا ست اللي على قلبي على لساني ومش هتغير، وأنا مبسوطة بنفسي كده ومش عايزة أتغير، ولو حاجة مقتنعة بيها أنا خاتم في صباعك طول ما إحنا بنشتغل، وفي أول مقابلة بيني وبين محمد سلامة، هو عمل مسلسل السنة اللي فاتت، وكان في مشهد ما أنا كنت متحفظة عليه بشكل رهيب لأني بحب الحيوانات.
وأضافت: أنا كنت أعرف اسم محمد سلامة، ولكن مش مجمعة الاسم مع الصورة، ودخلت سلمت عليه، وأول ما عرفت أنه مخرج مسلسل موسى وافتكرت المشهد اللي كنت متحفظة عليه، قولت له أنا زعلانة منك، ولو مكنتش اتصافيت مع سلامة في النقطة دي مكنتش هقدر اشتغل معاه.
وتابعت انوشكا: تاني مرة هنتقابل فيها، محمد سلامة أداني ميعاد في مكتبه وأتأخر 3 ساعات، وطلع عنده مشكلة أن الماسورة ضاربة عنده في البيت، وفي أخر يوم تصوير الكهرباء ضربت في الاستوديو.
واختتمت انوشكا، حديثها عن المخرج محمد سلامة قائلة: لما بدأت شغل مع سلامة، لقيت إن في نقاط تشابه كتير، وبعدين لاحظت أنه هو في داخله طفل كبير، ومش هنسى في أخر مشهد وبنتصور كلنا، ببص ورايا لقيته عينيه حمراء من الإحساس وقد إيه هو متأثر أننا خلصنا، أنا شوفت عينيه مدمعة أنا بدأت بردوا أعيط بسبب الضغط العصبي.
