ضربني 12 قلم على وشي.. ننشر أقوال فرد أمن كومباوند المعادي في التحقيقات
كشفت التحقيقات في واقعة التعدي على فرد أمن كمباوند المعادي، أن المتهم تعدى على فرد الأمن، واستعرض القوة تجاهه، واستمر في التعدي علية بطريقة وحشية.
وأوضحت التحقيقات، التي حصل القاهرة 24 على نسخة منها، أن فرد الأمن فوجئ بوجود سيارة بها شخص يريد أن يدخل الكمباوند، دون أن يوضح رقم العقار المحدد أو الشخص الذي سيتوجه إليه بالداخل؛ الأمر الذي رفضه المجني عليه، تنفيذا للتعليمات من قبل شركة الأمن؛ لينهال عليه المتهم و. ع، بالضرب، بـ12 صفعة، دون أي رد فعل منه.
وتنازل فرد الأمن عن واقعة الصفع والتعدي عليه، أمام هيئة المحكمة، بجلسة الأمس، قائلا: عفوت عنه لوجه الله، وواقعة الضرب؛ كانت عبارة عن مشاجرة، وليست استعراض قوة من المتهم.
تحقيقات فرد أمن كمباوند المعادي
واستمعت جهات التحقيق في بداية نظر القضية، إلى أقوال المجني عليه، والتي جاءت في التحقيقات كما يلي:
س: ما معلوماتك بشأن الواقعة لديك؟
اللي حصل وأنا في شغلي كفرد أمن في الفترة المسائية في كومباوند البارون، لقيت عربية سوزوكي بيضاء، وبداخلها 4 أشخاص، 3 شباب، والسائق راجل كبير، بحكم عملي؛ وقفتهم على البوابة رقم 5 للكومباوند، وسألتهم داخلين لمين؟، فقالوا لي ما نعرفش، بس إحنا داخلين جوه، قلت لهم طيب اركنوا على جنب، وكلمت الساكن عشان أعرف هو مين، وهتدخلوا تعملوا إيه؛ فردوا عليا وقالولي: ملكش فيه، رديت عليهم: بعد إذنكم كلموا الساكن؛ يعرفكم العمارة كام، والشقة كام.
وتابع المجني عليه في التحقيقات: الراجل الكبير اللي كان سايق، اتصل على التليفون، وكلم الساكن، وقال له يا باشا فرد الأمن مش عاوز يدخلنا، وعاوز يعرف إحنا داخلين ليه جوه، وهنعمل إيه؟، بعد كدة الراجل الكبير إداني التليفون، وقال لي رد على الساكن؛ فأخذت منه تليفون وبرد على الساكن؛ لقيته بيقول لي: يا ابني أنا العميد و. ع، وهم داخلين يصلحوا العطل اللي عندي في العربية، ودخلهم يلَّا.
بعد كدة قفلت معاه وأخذت منه الرخصة، وسجلتها في دفتر الأحوال، وبعد ما سجلتها؛ دخَّلت الأربع أشخاص داخل الكومباوند، وبعدها بربع ساعة، لقيت العميد و. ع جه، ومعه الأربع أشخاص دول، وقال لي: أنت فرد الأمن اللي على بوابة 5؟، قلت له أيوة، لقيته بيبلطج عليا، وبيتعدي عليا بالضرب بإيده على وشي ورقبتي، وسحلني وجرني على الأرض، وضرب فيا بإيده وبرجله، فقلت له: أنت بتضربني ليه؟.. فقال لي: أنت بتشتمني، ومش عاوز تدخل الناس اللي جاية ليا؟، قلت له ما حصلش، والله أنا ماشتمتكش، والناس اللي كانوا داخلين لحضرتك، مقالوليش إحنا داخلين ليه، ولقيته بيقول لي: اتصل بمدير الأمن.
س: متي وأين حدث ذلك؟
الكلام ده حصل يوم الخميس 28-4 حوالي الساعة 10 مساء، أمام كومباوند البارون، بمنطقة الهضبة الوسطى بالمقطم.
س: ما سبب تعدي المتهم و. ل عليك تحديدا؟
علشان أنا وقفت 4 أشخاص على البوابة كانوا داخلين ليه، وقالوا له إن أنا مرضيتش أدخلهم؛ فجه وتعدى عليا بالضرب.
س: هل كان المتهم يحمل سلاحا وأدوات أثناء الاعتداء؟
لأ.
س: هل قام أي من الأربع أشخاص المجهولين الذين كانوا رفقة المتهم سالف الذكر بالتعدي عليك وإحداث إصابتك؟
لأ.. ما تعدوش علي بالضرب، بس كانوا بيبلطجوا عليا معاه، وواقفين حواليه، وبيمنعوا أي حد يِحُوش.
س: كم عدد الضربات التي كالها لك المتهم؟
هو ضربني أكثر من 12 قلم على وشي بإيده، وسحلني على الأرض 3 مرات.
س: أين استقرت تلك الضربات؟
في كوعي الشمال ووشي وركبي الاتنين ورقبتي،
س: هل ثمة استغاثة بدرت منك؟
لأ.. مكانش مديني فرصة.
س: هل قام الأربع أشخاص الآخرين الذين كانوا رفقه المتهم بالتعدي عليك بالسب والقذف؟
أيوه.. واحد منهم قالي يا ابن الكلب وشتيمة تانية.
س: وهل استعرض المتهم و. ع القوة أو التهديد بالعنف أو أيهما تجاهك؟
أیوه.
س: ما مظاهر استعراض القوة التي أتاها المتهم سالف الذكر قبلك تحديدا؟
هو طبعا لما العميد و. ع جه وكان معاه الأربعة أشخاص، أنا خوفت واترعبت، وكانوا جاي يتعدعي عليا بالضرب والمنظر كان مرعب، وباين كده في الفيديوهات من كاميرات الكمبوند.
س/ هل معك مقاطع الفيديو التي تم التقاطها من كاميرات المراقبة المحيطة للكمباوند؟
لأ.. هي مش معايا، بس هي مع مشرف الأمن محمد أبو الدهب على تليفونه المحمول.
