زواج دون ذهب │ دعوات لإلغاء شبكة العروس.. وفتيات: كفاية دبلة وعريس محترم
مع ارتفاع أسعار الذهب وتجهيزات العرائس بشكل كبير، خلال الفترة الحالية، أصيب بعض الشباب بالإحباط خوفًا من عدم قدرتهم على توفير المال اللازم لشراء الذهب، خاصة مع ارتباط الذهب بقيمة العروسة في بعض المجتمعات المصرية.
تقبلي تتزوجي دون شبكة؟
«القاهرة 24» تواصل مع بعض الفتيات لمعرفة آرائهن في فكرة شراء الشبكة، وهل من الممكن أن تقبل الفتاة بالزواج من شاب دون ذهب؟
مونيكا مجدي، مدير مبيعات بإحدى الشركات الخاصة بالأدوات التكنولوجية، تقول: “ممكن جدا أتجوز ببدبلة فضة، عشان الوقت ده صعب جدا على الشباب، كمان حاجة تانية، ممكن قدام شوية نجيب ذهب، ده طبعا لو شخص كريم ومحترم ومش بيستغل الظروف عشان يهرب من الذهب وخلاص”.
في حين قالت فتاة أخرى: ممكن بس مش من غير دبلة، الدبلة زيها زي فستان الفرح كدة والبدلة بتاعة العريس والفرح مينفعش من غيرهم، وكمان مش هو اللي يشترط عليا، أنا ذوقيا اللي أقوله لكن ميجيش يقولي مش هجيب شبكة وهنتجوز.
شبكة بسيطة تكفي
وأكدت مروة لملوم، مدرسة لغة إنجليزية، أنها تقبل بالزواج بشبكة بسيطة، قائلة: مش شرط شبكة بفلوس كتير، ممكن حاجة في المعقول ومناسبة، وكمان العروسة بتجيب حاجات كتير وهي مش مطالبة بده، وسواء غالي أو رخيص مش الذهب اللي هيبوظ الجوازة.
واختلفت إنجي وليد، طالبة جامعية، معهن، حيث رفضت أن تتزوج دون ذهب، فقالت: معايير المجتمع بتربط قيمة البنت بالدهب، بس لو اتغيرت معايير المجتمع أقبل عادي، وكمان الولد اللي بيطالب بأننا منشتريش دهب هو نفسه اللي لو اتنازلنا عن الماديات هيروح لحد مش متنازل عنها.
ووافقت مريم ياسر، مدرسة لغة عربية: ممكن أوافق أتزوج من غير دهب، لأني مبحبش الدهب أصلا، هي كفاية دبلة والباقي يتكتب في القائمة.
وأبدت هالة علي رأيها في هذا الأمر، فقالت: أعتقد إن مفهوم الشبكة مبقاش زي الأول خصوصا لو اتنين بيحبوا بعض ممكن تبقى دبلة وخاتم أو دبلة وأسورة، هما غاليين بس أكيد مش بنفس قيمة شبكة كاملة.
وأضافت: أكيد في المقابل زي ما استحملته لازم أعين أهلي ومجيبش جهاز كتير، ممكن أجيب قطع حلوة وغاليه لكن مش بالكميات اللي بنسمعها من أمهاتنا، ولكن لو صالونات هتبقى شبكة كويسة مش هقبل بخاتم ودبلة، واتعلمت من أمي إن البنت مبتطلبش، لو هو مقدرني هيجيبلي نجمة من السما مش قطعة دهب.
الدبلة تكفي للزواج
وتقول دينا هشام: مبحبش الدهب وشايفة إن هي دبلة كفاية أوي تبين إن الاتنين مخطوبين مش أكتر، ويوفروا الفلوس اللى بتدفع كتير في حاجة، هتتشال أصلا وهيبقى كفاية إن الشخص محترم وكويس، مش هتتقاس بـ هيجيب قد إيه دهب ولا بكام وأهلي بردو موافقيني على الكلام ده.
وأكدت يوستينا بشرى، مديرة إدارة الموارد البشرية بشركة طبية، أنها توافق على ذلك، قائلة: مفيش أي مشكلة بالنسبة لي، طالما ده عائق من ضمن العوائق اللي هتقابلنا، فلازم نتغلب عليها، عشان كدة أوافق إني أتجوز من غير دهب عادي ونستثمر ده في حاجة تانية، رغم إن الدهب ليها قيمة معينة في المجتمع، بس مش هنقف عندها طالما ده عائق.
في سياق ذي صلة، دعا الدكتور عباس شومان، وكيل الأزهر الشريف، إلى إلغاء الشبكة بعد الارتفاع المتتالي في أسعار الذهب.
وقال شومان، في تصريح عبر صفحته على فيسبوك: "بعد الارتفاع المتتالي لأسعار الذهب ليت الناس يرخصونه بالاكتفاء بدبلة كشبكة ومهر عند الزواج".
كما أطلق عدد من الشخصيات العامة دعوة من خلال مواقع التواصل الاجتماعي للتيسير في المهور عند الزواج خاصة ما عرف مجتمعيًا باسم «الشبكة» بعد الارتفاع المتتالي الذي شهدته أسعار الذهب.
