لبلبة لـ عادل إمام في عيد ميلاده: ببقى مستريحة لما بشتغل معاك.. دايمًا بتحس بنبض الشارع
تحدثت الفنانة لبلبة عن الفنان عادل إمام في عيد ميلاده، والأعمال التي قدمتها معه وأبرزها مسلسل صاحب السعادة، ومسلسل مأمون وشركاه.
وقالت لبلبة في تصريح خاص لـ القاهرة 24: كل سنة وأنت طيب يا أجمل قلب مش ممكن أنسى الأيام الحلوة اللي اشتغلنا فيها مع بعض وعملنا أنجح أفلامنا، وبرضه في التليفزيون عملنا أحلى مسلسلين عندي صاحب السعادة ومأمون وشركاه.
وأضافت لبلبة: مش بنسى أبدا الأيام الحلوة، ووقفتك جنبي لما فقدت والدتي، في حاجات جميلة جدا بحبها فيك حبك لأصدقائك ومش بتنسى أصحابك ودايما بتحس بنبض الشارع ودايما بتقدم فن راقي حلو.
واستكملت حديثها: لما بشتغل معاك دايما ببقى مستريحة، أنت أسعدت كل الناس، ضحكت الناس وفي نفس الوقت بكيتهم يا أعظم فنان حب فنه وأخلص له.
واختتمت لبلبة حديثها عن عادل إمام: أنا بحبك أوي، أنا كونت معاك أجمل أعمالي وأجمل ثنائي الناس حبته لما بروح أي حته بيقولي سلميلنا على عادل إمام، ربنا يخليك ليا ويحافظ عليك كل سنة وانت طيب يا زعيمنا يا حبيبنا.
أعمال جمعت عادل إمام ولبلبة
جمع بين الفنان عادل إمام ولبلبة العديد من الأعمال سواء في السينما أو الدراما، ومن أبرز هذه الأعمال فيلم عصابة حمادة وتوتو، حسن ومرقص، عريس من جهة أمنية، خلي بالك من جيرانك، وقدمت معه عملين في الدراما وهما صاحب السعادة، مأمون وشركاه.
