لقاء سويدان عن سمير صبري: الناس بتقول ملهوش أهل.. وإحنا كلنا عيلته
كشفت الفنانة لقاء سويدان، كواليس ذكرياتها مع الفنان سمير صبري، الذي رحل عن عالمنا أمس الجمعة، نتيجة أزمة قلبية مفاجئة.
وقالت لقاء سويدان خلال لقائها مع القاهرة 24: أستاذ سمير كان ليه غلاوة ومعزة كبيرة جدًا عندنا، كان راجل طيب جدًا ومحترم وفنان مفيش زيه ومحاور ومثقف ومغني، وأهم من ده كله كان بيسأل على كل الناس، ويهتم ويحب كل الناس، ومعندوش نوع من التكبر ولو حس بأي حد لا يتردد في مساعدته.
سويدان: الوسط الفني كله حزين على رحيل سمير صبري
وتابعت: الوسط الفني كله حزين وفي عيون كل الفنانين الحزن، وأستاذ سمير كان حاجة كبيرة أوي عندنا، الناس بتقول ملهوش أهل، وإحنا كلنا أهله وعيلته وأولاده وحبايبه ومعجبينه.
وأضافت سويدان: كان في مواقف شخصية كتيرة بيني وبين سمير صبري، وكان حابب جدًا نقطة فيا إني بغني وأمثل وبعمل استعراض، هو كان أول حد يعرف بزواجي السابق، وأول ما عملت فيديو كليب كان من أوائل الناس اللي شجعتني وكلمتني، وقالي حلو جدا لما عملت مسلسل قاتل بلا أجر ونجح وكرمني.
وواصلت: كان مؤمن جدًا بالموت ومش خايف منه، ومؤمن بقضاء ربنا وكان حبوب أوي، وبيحب الدنيا وعمره ما أتكلم كلمة وحشة على حد.
جنازة سمير صبري
وحضر جنازة الراحل سمير صبري، العديد من نجوم الفن أبرزهم هاني رمزي، يسرا، إلهام شاهين، ليلى علوي، ميرفت أمين، نادية الجندي، ومنير مكرم، وأحمد السقا، وغيرهم.
