غادة إبراهيم عن سمير صبري: كان يعاني من السرطان وليس القلب.. ومكنش عايز حد يشوفه وهو مكسور
كشفت الفنانة غادة إبراهيم، تفاصيل الأيام الأخيرة في حياة الفنان الكبير سمير صبري، الذي رحل عن عالمنا أول أمس الجمعة عن عمر ناهز الـ 86 عاما.
وقالت غادة إبراهيم، في حوارها مع القاهرة 24: من أول ما عرفت إن الفنان سمير صبري، موجود في مستشفى المعادي القوات المسلحة، وأنا كلمت أستاذ محسن علم الدين، ده أستاذي وأبويا الروحي، وصديقه الصدوق، اتصلت عليه سألت عن حالة سمير صبري، قالي هو كويس، قلت له قول الحقيقة والله ما هقول لحد أنت عارف غادة صادقة، قال لأ مش قلب هو كانسر (سرطان) وتوغل للرئة وسيطر على جزء كبير جدًا والموضوع صعب والدكاترة بيقولوا فاضله أيام، أقسم بالله ما الكلام ده مطلعش لـ مخلوق حتى أمي متعرف.
تفاصيل مرض سمير صبري
وتابعت غادة إبراهيم: قلت طيب أنا عايزة أشوفه، رد عليا محسن علم الدين، قالي بصي هو مش عايز حد يشوفه وهو مكسور كده وتعبان، بس هو بيقاوح وبيقول أنا كويس، كان طول الوقت حي وجواه شباب، عمره ما بين إنه مريض، كنت بهزر معاه بقول له عندك إيه يا حبيبي؟
، قال شوية دلع في القلب وأنا خارج بعد بكرا وهنروح نسهر، كان نفسي أسمع صوته وأنا عارفة هو عنده إيه، كان طول الوقت عنده أمل في الحياة، أنا لآخر يوم في عمري، مش هنسى هو عمل معايا إيه في أزمتي 2016.
وفي سياق متصل، كان الفنان الراحل سمير صبري، أعلن عن إصابته بالسرطان في وقت سابق، خلال مداخلة مع الإعلامية بسمة وهبة على قناة المحور، موضحًا أنه مريض سرطان منذ فترة طويلة ويحصل على العلاج الكيماوي منذ أكثر من عام، وهو ما أثر على القلب.
وأضاف صبري قائلًا: من المفترض أن أُجري عملية جراحة في القلب خلال الأيام القليلة المقبلة، وادعوا لي أطلع منها سليم، كنت مصاب بالسرطان وقضيت عليه الحمد لله، ولكن العملية جامدة عليا شوية وكبيرة ومحتاجة رعاية جامدة جدًا، وإن شاء الله أتخطاها بفضل الله ودعوات جمهوري، مثلما انتصرت على السرطان.
