مي حلمي بعد التنمر عليها: مبسوطة بنفسي إن قلبي ما حنش ولن أتنازل عن القضية
كشفت المذيعة مي حلمي، أنها لن تتنازل عن القضية التي رفعتها ضد إحدى مقدمات البرامج على مواقع التواصل الاجتماعي، معتذرة لكل شخص طلب منها التنازل عن القضية.
وقالت مي حلمي، خلال فيديو عبر ستوري حسابها بموقع انستجرام: المرة دي بعتذر ليكم.. أنا مش هاخد رأيكم، الناس سألت عليا طوب الأرض عشان أتنازل ولكن لن أتنازل، لأن لازم يكون في عقل قبل ما نعمل أي حاجة، مش عاوزة أبوّخ في الكلام عشان ما يتحسبش عليا، لأني من بيت متربي.
وأضافت: كان لازم يكون في عقل قبل ما نخوض في عرض حد أو نتكلم عن حد.. وأنا مش هتنازل ولا بمليون آسف أو آسفة ولا تعويض يراضيني ولا عاوزة فلوس ولا عاوزة أي حاجة أنا عاوزة أخد حقي من أي حد يتنمر على أي حد أو تسول له نفسه أنه يحكم على حد طول ما ربنا موجود وقضائنا عادل وشامخ وإحنا في دولة قانون.
وتابعت مي حلمي: كان ليه من الأول! علشان إيه نهين عيلتنا وبيتنا واسمنا ومستقبلنا عشان كام لايك ومشاهدة.. ومبسوطة بنفسي إن قلبي ما حنش ولا رق.. وكلمة عفا الله عما سلف ما تجيش في أهل بيتك ولا عرضك ولا سمعتك وشرفك.. كان فين العقل قبل ما نعمل حاجة تسيء لبني آدم ما أسأش لينا وما ضرناش وما شفناش منه حاجة وحشة وما عشرناهوش آسفة لن أتنازل، ريحوا مجتهوداتكم وما تبعتوش ليا حاجة تاني ولا أي حد يكلمني لأني ليا حق كبير أوي.
واستكملت: أكتر حاجة أتعلمتها ما أسبش حقي مهما كان.. ونصيحة مني ما تسيبوش حقكم.. عاوزين تتنمروا عليا قدام الجميع والمصالحة تكون في الخفى.. أنا مش بتاعة مشاكل لكن مش هسيب حقي وعشان تكونوا عبرة لمن يعتبر.
واختتمت مي حلمي حديثها قائلة: اوعوا يكون ليكم حق وتتنازلوا عنه.. ده الدنيا تزعل منكم لما تسيبوا حقكم وتبقوا ملطشة للدنيا.. اللي يغلط يحاسب على المشاريب.
وكان المستشار ياسر قنطوش، تقدم ببلاغًا للنائب العام المستشار حمادة الصاوي، بعد الإساءة لموكلته المذيعة مي حلمي من قِبل إحدى مقدمات البرامج على مواقع التواصل الاجتماعي.
ووجهت مي حلمي الشكر للمستشار ياسر قنطوش، وقالت عبر استوري حسابها بموقع انستجرام: أستاذ ياسر أشكرك على أنك غير المحامي بتاعي أنك دايمًا في ضهري وحصن منيع ليا قدام كل من يحاول التطاول دون حق وسرعة اتخاذ القرار.
