مخرج برنامج سمير صبري: الراحل لم يتحدث عن نجله ولم يزور لندن منذ 7 سنوات
علق المخرج محمد تركي على القصص المتداولة على مواقع التواصل الاجتماعي، حيال نجل الفنان الراحل سمير صبري، خاصةً أنه كان مقربًا من الراحل خلال آخر 7 سنوات من عمر الراحل.
وقال محمد تركي لـ القاهرة 24: الراحل سمير صبري عمره ما جاب سيرة مراته أو ابنه خلال السبع سنين اللي قربت منه، ومكنش يحب أي حد يخترق خصوصيته ولا هو يخترق خصوصية حد.
وتابع: الناس بتطلع كل شوية كلام كتير عن ابنه، وفيه قصة متداولة إن بعض المقربين نصحوه في المستشفى قبل ما يموت إنه ينهي قصة زواجه المزيفة ويطلع يقول إنه كان بيكدب لأن الموضوع هيتعرف بعد ما يموت، والحقيقة إن القصة دي محصلتش وأنا كنت معاه آخر أيامه في المستشفى، ومحدش يجرؤ يكلم أستاذ سمير في حاجة زي دي.
وأضاف محمد تركي: اللي أعرفه إن أستاذ سمير مسافرش لندن آخر 7 سنين من حياته، هو سافر مرتين يعمل عمرة ومرة للإمارات في آخر 7 سنين بس، أنا كنت بشوف الباسبور لأني كنت معاه وبجهزله هدومه للعمرة.
وفاة سمير صبري
رحل سمير صبري عن عالمنا يوم 20 مايو الماضي، عن عمر ناهز 86 عامًا، وتم تشييع جثمانه وأداء صلاة الجنازة من مسجد الشرطة في منطقة السادس من أكتوبر، ونقله إلى مثواه الأخير في مدافن العائلة بمحافظة الإسكندرية.
