شريف مدكور يطرح حلًا لتقليل الطلاق: الزواج يكون في سن الثلاثينات
أشاد الإعلامي شريف مدكور بمسلسل فاتن أمل حربي، الذي تم عرضه ضمن المارثون الرمضاني الماضي، وتناول قضية مهمة من قضايا المرأة وهي حضانة الأم المطلقة للأبناء في حالة زواجها مرة أخرى.
وقال مدكور خلال برنامجه شارع شريف المذاع عبر قناة الحياة، إن اختيار الشخص المناسب لا يعتمد على المؤهل أو العمل، مضيفًا: أهم حاجة شخص مؤدب وكسيب يقدر يفتح بيت ويصون البنت، ياما شفنا دكاترة وماجستير يتزوج ويطلق ويرميها بعد شهر واحد من الجواز، ولما المسلسل المحترم اتعمل في رمضان قالوا ده مش موجود في المجتمع، انتوا بتهزروا ولا بتدفنوا راسكم في الرمل، ليه مش بتشوفوا محاكم الأسرة، ده من أحسن المسلسلات في تاريخ الدراما المصرية، بيورينا اللي بيحصل في البيوت ولا هنقعد نداوي في الجروح من غير حل عشان تعمل غرغرينا.
ورأى أن الحل لتقليل حالات الطلاق، هو عدم الزواج في العشرينات والزواج في الثلاثينات، قائلًا: أنا بشوف الحل إن الجواز ميبقاش في فترة العشرينات لكن الراجل يتجوز وهو 35 والبنت تكون سن 30 أو 31 يكونوا اشتغلوا وشافوا الدنيا ويبتدوا يفكروا في بناء بيت.
وتحدث عن نماذج لشباب ترك المؤهل وعمل في مهن بسيطة بشكل مبتكر، قائلًا: عندي واحد صاحي كان بيشتغل في فيس بوك وعنده فيلا في كاليفورنيا، ساب كل ده وعمل شركة حانوتي لتغسيل الموتى، والشباب اللي بيتشغلوا عنده خريجي جامعة أمريكية، عملوا حاجة بطريقة مختلفة جدًا وبيغلسوا ميتين وبيكسبوا كويس، ناس تانية صحابي عملوا عربية لتنضيف وتحميم الكلاب، أنا واحد من الناس عندي كلب وبصرف عليه، وهما بدأو المشروع بعربية ودلوقتي بقى عندهم أربع خمس عربيات ومش ملاحقين أفكار وشغل مش شرط خريج أيه وإيه.
