خالد عليش يرد على اتهامات طليقته: يعني إيه بتاجر بـ صور بنتي؟
علق الفنان والإعلامي خالد عليش على اتهامات طليقته ميما الشايب، بشأن استغلاله قضية ابنته، حتى يصل إلى التريند، ويصبح حديث مواقع التواصل الاجتماعي، وتعجب الإعلامي من اتهام طليقته له بالمتاجرة بابنته.
وقال خالد عليش منشورًا، عبر حسابه الشخصي بموقه التواصل الاجتماعي فيس بوك: الحقيقة أنا مبلم بقالي شوية من ساعة ما قريت ده، ومش مصدق ده محضر معمول فيا من 12 ديسمبر 2022، أنا لسه مكتشفه بعيدًا إن هو بيأكد صدق روايتي، إني مش عارف أشوف بنتي بشكل سليم في الوقت ده، وده اللي خلاني ألجأ للعقد اللي بينا وعمل إلزام بما فرضته نفسها على نفسها، والمحكمة حولته لرؤية في مركز شباب، وبعدها روحت وما كملتش والقصة الطويلة العريضة في البوست اللي فات.
وتابع عليش: بس مش قادر أصدق أن ده محضر أتعمل فيا، مش قادر أفهم يعني إيه خدتها ومأكلتهاش، يعني إيه ما اديتهاش الأدوية، يعني إيه ببعت أشخاص غريبة تجيبها، يعني إيه بتاجر بصورها؟، طب ليه عايز أشوفها؟، طب ليه بعمل كل ده.
أزمة خالد عليش وابنته
وأضاف خالد عليش: ده أنا قلبت في الموبايل عشان أشوف في التاريخ ده، يمكن فعلا عملت حاجة تضايق، لقيت إني ماشفتهاش يوم 12 أصلًا، وبعدها بيومين جبتلها هدية عشان الڤلانتين، في الآخر يتعمل فيا محضر ويتقال عليا الكلام ده من ورايا ليه كل ده، هل يريح الأم وأصحابها إني أطنش وأكبر دماغي، وأسيب البنت وما أشوفهاش خالص، بالمناسبة المحضر ده تم نشره عن طريق الأم مش أنا اللي عرفته لوحدي، أنا بجد مش مصدق وكإن في إصرار إني أنا أطلع وحش وخلاص.. ربنا يهدي.
