الخير في أمتي إلى يوم القيامة.. صاحب محل نظارات يقرر توفيرها مجانًا لغير المقتدرين ماديا
كفاية الدعوة اللي الواحد بياخدها من الناس، وبيحس فعلا إنها طالعة صافية من قلوبهم.. هكذا بدأ عمرو محمد فتحي، صاحب الـ 29 عامًا حديثه حول تخصيص جزء من محل النظارات الخاص به لخدمة غير المقتدرين ماديًا.
صاحب محل نظارات يقدمها مجانا لغير المقتدرين
تخرج عمرو في كلية اللغات والترجمة بجامعة الأزهر الشريف، ثم عمل في محل النظارات الخاص بوالده في منطقة جسر السويس، والذي بدأ العمل به منذ كان عمره 10 سنوات، وبعدها قرر افتتاح محل خاص به.
يقول عمرو لـ القاهرة 24: إحنا الحمدلله بكرم ربنا شغالين في مجال النظارات والعدسات، بس ساعات بيجي علينا حد يقول مثلا عايز حاجة رخيصة أو حد بتحس إنه غير قادر على تكلفة النظارة والعدسات، فمثلا لو شايف في إمكانيته إنه يدفع، باخد منه مبلغ رمزي يكاد يكون التكلفة فقط أو أقل. لو لاحظت إنه غير قادر فعلا أو مثلا صديق ليا بعتهولي وقالي إنه غير قادر، فبعمله النضارة بالعدسات مجانا لوجه الله، والواحد بيعتبرها صدقة أو أي حاجة لوجه الله..
وتابع: كان الله في عون العبد ما دام العبد في عون أخيه، وربك بيعوض ويكرم يعني، مشيرًا إلى أن والده يعمل في هذا المجال منذ عام 1999، وهو من بدأ توفير النظارات لغير المقتدرين، ثم ورث الفكرة منه.
وعن أبرز المواقف التي لا ينساها، يقول عمرو: مرة شخص كان بييجي كل يوم يقف قدام المحل عندي ويتفرج ويمشي لمدة مثلا 3 أو 4 أيام ورا بعض، فجيت في مرة قولتله: اتفضل أقدر أساعدك إزاي؟، فقالي إن بنته محتاجة نضارة بس بيقول إن مش لاقي حاجه مناسبة للسعر اللي معاه.
ورث الفكرة من الأب
وأكمل: قولتله هات بنتك وتعالى، وبالفعل جابها واختارت النظارة والعدسات وخلصناها من غير أي مقابل، بل بالعكس قدام بنته قلت إنه دفع المبلغ وكل حاجه عشان تفتخر بوالدها، وكان كفايه بس الفرحة اللي في عين الأب وبنته.
ربنا يوسع رزقك ويكرمك ويبعد عنك ولاد الحرام ويبارك لك في مالك وصحتك.. يؤكد عمرو أن هذا الدعاء أكثر ما يسمعه من الناس، مضيفًا: الواحد فعلا مش محتاج أكتر من كده.
وأضاف: والدي هو اللي علمني الموضوع ده، وكنت بشوفه بيعمل كدة مع الغريب قبل القريب، وكان دايما يقول كله لله، واللي عند ربنا مبيروحش.
واختتم حديثه قائلًا: أحب أوصل رسالة لأي حد غير مقتدر على عمل نظارة أو عدسات يكلمني وأنا تحت أمره، وأحب أقول لأي حد مقتدر على مساعدة الناس في بعض شئونهم ميبخلش عليهم ويساعدهم على قد ما يقدر وهيلاقي أثر ده في حياته وفي بيته وفي الآخرة عند ربنا كمان.
