سمية الخشاب تنصح طلاب الثانوية العامة: ذاكروا مع بعض وبلاش قلة سلكان
تستمر الفنانة سمية الخشاب في توجيه العديد من النصائح لطلاب مرحلة الثانوية العامة، بالإضافة إلى نشر أهم المعلومات من المواد التي يدرسونها، منها فصل الكمياء العضوية في مادة الكمياء.
وكتبت سمية الخشاب عبر حسابها الشخصي على تويتر: ساعدوا بعض وذاكروا مع بعض وبلاش قلة سلكان عشان كل حاجة بالنيات.
وأعطت الخشاب عددًا من النصائح في مادة الكمياء، وتحديدًا في فصل الكمياء العضوية، وكتبت: هتلاقي أكتر حاجة داخل فيها أسهم البنزين، فانت هتبدأ في الامتحان بكربيد الكالسيوم هتنزل منه بسهم للأسيتايين، وبعدين تدخل به على البنزين، وتستلم البنزين بقى، البنزين طالع منه 6 أسهم، 4 تحت وواحد على اليمين وواحد فوق، افتكر الـ 4 اللي تحت ببنزين 80 و90 و95 وسولار.
وأضافت: كده باقي سهمين، واحد فوق لـ ch3، وواحد هيكمل على اليمين اللي هو كلوروبنزين وهكذا، ليه اخترت البنزين، عشان تفتكروا في الامتحان بعدد الأسهم، وفي 41 سهم داخلين فيه، مع المذاكرة هتحفظ الشكل، حاول تفهمها بقى وكده بالطريقة دي هتقدر تفتكر على قد ما تقدر.
آخر أعمال سمية الخشاب
يذكر أن سمية الخشاب، تعاونت مع مطرب المهرجانات عمر كمال، من خلال أغنية أوعدك، التي طرحتها عبر قناتها الرسمية بموقع يوتيوب، ولكن شهدت تلك الأغنية خلافًا بينهما، وأشار عمر كمال في تصريحات تليفزيونية، إلى أن سمية لم تلتزم ببنود عقد التعاون على هذا العمل.
