ميار الببلاوي تنهار من البكاء بسبب مرض ابنها: شكل حلمي السنين دي كلها ضاع في لحظة
كشفت الفنانة ميار الببلاوي، تفاصيل حالة ابنها الصحية؛ بعد تعرضه لوعكة صحية خلال الساعات الماضية، مطالبة من متابعيها وجمهورها، الدعاء له بالشفاء العاجل.
وقالت ميار الببلاوي، في تصريح لـ القاهرة 24، إن حالة نجلها تزداد سوءًا منذ يومين، ويتابع مع الطبيب في المنزل، وتم تشخيص حالته بأنه يعاني من جرثومة سيطرت على الأمعاء بشكل كامل؛ وسببت له المزيد من الألم.
وأكدت أنه في المرحلة النهائية من بكالوريوس الاقتصاد والعلوم السياسية، متمنية أن يعبر من هذه المرحلة بأمان.
وأضافت وهي منهارة من البكاء: الدكاترة قالوا إن عنده جرثومة ماسكه الأمعاء، وألمها صعب، والنهاردة الحمد الله بقى أفضل، وأخذ حقن كتير جدًا، عنده امتحان آخر مادة ليه النهاردة، هو في بكالوريوس اقتصاد وعلوم سياسية، وآخر مادة ملهاش إعادة، ولو بعد الشر حصل حاجة فيه؛ هيعيد السنة عشانها.
وأشارت ميار الببلاوي، إلى أن حالته غير مستقرة ولم تكن تسمح له بالذهاب لأداء امتحان آخر العام، ولكن أصدقائه كانوا حريصين على الذهاب معه إلى الامتحان، مضيفة: تعبي وشقايا 22 سنة، دلوقت مستنية بس تلفون من ابني يقولي إنه حلّ في الامتحان، إن شا الله يجيب مقبول، يعدي بس، ده جايب امتياز في كل المواد اللي عدت، وكان نفسي أفرح النهاردة إن أنا خلصت مشواري التعليمي معاه.. هو مالوش أبّ، محدش ربى ابني معايا.
وأنهت حديثها، بالدعاء لابنها بالشفاء العاجل، وأنها راضية بقضاء الله، داعية أن لا يضيع حلمها في حصوله على تقدير، بقولها: أنا كنت بحلم بتقدير؛ علشان نفسي أشوفه في الخارجية، بس شكل حلمي السنين دي كلها ضاع في لحظة.
تفاصيل حالة نجل ميار الببلاوي الصحية
وكانت ميار الببلاوي، أعلنت عبر حسابها الشخصي بموقع فيسبوك، تعرض نجلها لأزمة صحية، وكتبت: إيه ده، إيه الدنيا دي، الواحد عايش في كوكب، لوحده، ملهوش حد، ولا يفرق مع حد، كله بيقول يلَّا نفسي، ولو ليه مصلحة عندك؛ يعملك نفسه مروحة، ولو مالوش؛ ما يلزموش، دي كلمة ست طيبة لقتني ببكي في المسجد بتاع المقابر، وقالت ليا: دموعك غالية، وفَّريها، الجايات كتير، والله استغربت كلامها، وكأنها تؤهلني للي جاي.
وأكملت الببلاوي منشورها: النهاردة ابني من الصبح بيموت بين إيدي، بيرجَّع ويتلوَّى من المغص، ودكاترة داخلة، ومحاليل وحقن وأدوية، وبكره الصبح، امتحانه؛ لأنه في بكالوريوس، ودي آخر مادة، طبعًا كده خلاص، مفيش أمل إلا بمعجزة من عند ربنا؛ لأنه رايح والسخونية 40، ألاقي حد حقير كلمني، وبحكيلة أن ابني تعبان وبيموت من المغص وبيصرخ، يطلب الطلب اللي هو عاوزه ويقفل، عاوزه أقول: الله ما يحوج حد لحد، بس بعد الضنى مفيش، وكده حلو قوي.
