وائل علي لـ القاهرة 24: بقالي 5 سنين مبشتغلش معرفش ليه.. أروح لمين أقوله عايز أشتغل؟
تحدث الفنان وائل علي، عن أزمته الأخيرة، بشأن عدم حصوله على فرص عمل في مهنة التمثيل منذ فترة طويلة، مشيرُا إلى أنه لم يعرف سبب عدم عمله لمدة 5 سنوات على الرغم من تعاونه مع كبار نجوم الكوميديا منهم سمير غانم وسعيد صالح.
وقال وائل علي، في تصريح لـ القاهرة 24، عن أسباب مشكلة عدم خلق فرص عمل له في مجال الفن، سواء له أو لأحد من الزملاء، مردفًا: المشكلة مش عندي لوحدي بالعكس، ناس كتير جدًا في الوسط الفني، وفيه ناس أعضاء نقابة زيي وأشطر مني ومش بيشتغلوا.
وأضاف وائل علي: دلوقتي اللي بيشتغل الشلل والأصحاب والأحباب فقط وطول مليش حد فيهم مش هتشتغل، والدليل إن فيه ناس كتير مش بيشتغلوا سنة واتنين وثلاثة.. وأنا بقالي 5 سنين مشتغلتش معملتش مسلسل لية علشان إيه.. وأنا قدمت أعمال كتير منها بوجي وطمطم.. وقدمت زيزينيا، مع أحمد صقر، وهوانم جاردن سيتي جزءين، وعملت الإمام المراغي.. عملت أدوار كويسة جدًا مش أدوار صغيرة ولا ثانوية، بالنسبة للمسرحيات اشتغلت مع نجوم الكوميديا الكبار.. سمير غانم، وصورت معاه مسرحيتين، مراتي زعيمة عصابة، والزهر لما يلعب صوّرتها قبل وفاته، وكنت من أبطال العمل.
واستكمل وائل علي: تعاونت كمان مع سعيد صالح الله يرحمه.. وأستاذ أحمد بدير قدمت معاه مرسي عامل كرسي.. اشتغلت مع ناس كتير بقالي 5 سنين معرفش مبشتغلش، ليه أروح لمين أقوله عايز أشتغل، أنا سعيت كتير جدًا وحاولت أكلم كذا حد يقولي حاضر وعيني وجميل.. وأنا خجول لما أكلم واحد مرة مبحبش أكلمه تاني.
وائل علي: المفروض نعمل إيه علشان نشتغل في مهنتنا
وسبق، وأعلن الفنان وائل علي، استياءه من الوسط الفني، بسبب عدم حصوله على فرص منذ فترة طويلة، متسائلًا: ماذا يفعل حتى يحصل عليها؟.
وكتب وائل علي، عبر حسابه الشخصي بموقع فيسبوك،: أقسم بالله أنا ممثل، ومهنتي في البطاقة ممثل، هو المفروض نعمل إيه علشان نشتغل في مهنتنا.. حسبي الله ونعم الوكيل.
