وائل علي يطالب أشرف زكي بعقد بروتوكول تعاون مع شركات الإنتاج لإيجاد فرص للفنانين
قال الفنان وائل علي، إن الدكتور أشرف زكي نقيب المهن التمثيلية، يستطيع مساعدة عدد من الفنانين، الذين لم يتمكنوا من ممارسة مهنة التمثيل، خلال الفترة الماضية، بسبب معرفته الطاغية بالعديد من شركات الإنتاج والمخرجين، ولكنه لا يستطيع إرضاء ومساعدة الجميع، مشيرًا إلى أن التمثيل عرض وطلب.
وقال وائل علي: في تصريح خاص لـ القاهرة 24: نقابة المهن التمثيلية تقدر تحل الموضوع، لو هي عايزة تحله تقدر إنها تطبق القوانين واللوائح الموجودة عندنا في النقابة.. القانون بيقول المفروض الأعمال الفنية وأي عمل يشتغل فيه 90 في المئة من أعضاء النقابة، و10 في المية تصاريح، دلوقتي لو شفنا أي عمل مش هنلاقي الكلام ده.. هنلاقي 50 في المئة نقابة وقصادهم 50 في المئة تصاريح.. وناس مش أصحاب المهنة وده غلط، المفروض جزء تنظيمي لازم يكون من خلال النقابة.. لوالقانون دا اتطبق كلنا هنشتغل.. ده أبسط حاجة النقابة تقدر تعملها.
وأضاف وائل علي: النقابة لو جينا اتكلمنا معها بيقولوا الشغل ده عرض وطلب، ده أبسط رد بيقولوه، لكن زمان كان في حاجة اسمها قطاع الإنتاج.. شركة صوت القاهرة.. مدينة الإنتاج الإعلامي.. كل دول كان بينتجو وبيشتغلوا.. وكلنا بنشتغل.
وواوصل وائل علي حديثه: الموضوع ده بقالوا كذا سنة وحتى في الجمعية العمومية الناس بتطلع وتقول نفس الكلام مش أنا بس.. وكل مره أشرف زكي يقول إن شاء الله هنشتغل على حلول للموضوع ده.. ولكن هو بيخدم على قد ما يقدر ومش بيقصر لكنه مش هيقدر يخدم كل الناس.. دكتور أشرف كراجل نقيب على علاقة قوية بجميع شركات الإنتاج.. وأيضًا علاقته قوية بالمخرجين، ويقدر يعمل معاهم بوتوكول تعاون، ويكلمهم على فنانين، وهيوافقوا لأنهم مش هيأخروا له طلب، ولكن هو بيعمل اللي يقدر عليه.
آخر أعمال وائل علي
ويشار إلى أن وائل علي، شارك في مسرحية البارون، التي تعد آخر عمل فني تم عرضه، عام 2017، ودارت أحداثه حول الشاب ماهر، الذي يعمل بمكتب طباعة دراسات قانونية، ويتورط مع الشخص الخطأ، بعد مقتل جاره، ويتم سجنه فيقدم نصائح قانونية لزملائه، إلى حين خروجه وإثبات هوية القاتل.
وضم مسلسل البارون، نخبة من النجوم، منهم: عمرو عبد الجليل، وائل علي، ماهر عصام، محمد عادل، ملك قورة، دنيا عبد العزيز، جهاد سعد، نهى عابدين، أحمد فريد، وهو من تأليف أحمد صبحي، وإخراج إيهاب عمرو.
