حمو بيكا: معرفتش أسافر أمستردام بسبب تعليمي.. وأنا في دبي دلوقتي عشان أشتغل
وضح مؤدي المهرجانات حمو بيكا سبب المنشور الذي نشره على حسابه الرسمي بـ فيس بوك بخصوص التعليم.
قال حمو بيكا في مداخلة هاتفية في إحدى البرامج التليفزيونية: سافرت أمستردام وعشان تعليمي معرفتش أخرج من المطار ولا أتكلم، ولو أنا متعلم مكنتش احتاجت لحد والطيارة فاتتني بسبب أن كل الكلام بالإنجليزي، ومش عارف لا أقرأ ولا أكتب.
وأضاف حمو بيكا: التعليم هو كل حاجة وفات الأوان ومفيش وقت أني أتعلم، بس أنا دلوقتي في دبي وبحاول أشوف مدرسة أتعلم فيها، واستقريت في دبي عشان أشتغل بقالي شهر في دبي ونفسي أنزل مصر.
وفي سياق متصل، نشر حمو بيكا منشور على حسابه الرسمي بـ فيس بوك عن التعليم وعلق عليه: رسالة لطلاب الثانوية العامة والكليات، هو أنا اه مش متعلم وأخدت محو الأمية بالعافية لكن ده مش حاجه تفرح، ولا تقول عندك بيكا أهو مش متعلم بس ناجح، صدقوني والله طعم النجاح مع العلم مختلف تمامًا عن طعم النجاح من غير علم.
وأضاف حمو بيكا: العلم بيفرق في كل حاجة في الدنيا، كمية معاناة بشوفها يوميًا بسبب أني مش متعلم، ومش بتمنى حد منكم يشوفها أو يتعرض لها، العلم بيستر كتير أوي وبيخليك واعي ومتفتح في كل مجالات الحياة.
وتابع حمو بيكا: هو اه الشارع علمني كتير، بس مش زي المدارس والجامعات، حتى لو مش هتشتغل بشهادتك وحتى لو دخلت كلية مش بتحبها، بس يكفي أنك متعلم ومعاك شهادة تقدر تسد بيها عين الشمس، اتعلموا وخلوا بالكم من تعليمكم وشهادتكم لأنها هتفرق كتير اوي معاكم ومع عيالكم بعد كده.
