إحنا كده من زمان.. كريمة منصور: أفلام محمد رمضان بريئة من انتشار البلطجة
تحدثت الفنانة كريمة منصور، عن رأيها في الانتقادات التي تعرض لها الفنان محمد رمضان، خلال الأيام الماضية بعد حادث ذبح الطالبة نيرة أشرف أمام جامعة المنصورة، إذ يرى البعض أن هذه الجرائم انتشرت بسبب الأعمال الفنية التي طرحها محمد رمضان منذ بداياته، وتسببت في خلق حالة من البلطجة والقتل.
وأكدت كريمة منصور خلال لقائها مع القاهرة 24: إن بعض مستخدمي السوشيال ميديا، لديهم حالة مرضية عبارة عن هوس بعدد المتابعين وكم الإعجابات، وأن معايير المجتمع اختلفت، قائلة: أنا علاقتي بالسوشيال ميديا ضعيفة لأني حاسة إنّي في مرحلة علاقة مرضية على السوشيال ميديا والمعايير اختلفت وبقوا بيهتموا مين عنده فلورز لدرجة إن في ناس بيجيلها أمراض وبتنتحر بسبب الموضوع ده.. ده بالنسبة ليا شيء مرضي ولازم يبقى في وقفة.
وتابعت كريمة منصور: السوشيال ميديا، أصبحت سلاح ذو حدين ممكن يكون مهم جدًا لو استخدمته صح ولكن في جانب مظلم لو تم إساءة استخدامها.
وعن التعليقات التي تتعرض لها عبر السوشيال ميديا، قالت كريمة منصور: أنا بشوف إن في عدد من الانتقادات التي يتم توجيها للعديد من الفنانين الشاطرين جدًا مش فاهمة سببه.. الفنان بالحاجات اللي بيقدمها، حياته الشخصية، مش المفروض تكون مستباحة للجمهور بالطريقة دي لأن عنده حياته الخاصة ومينفعش حد يسأل فيه.
كريمة منصور: إيه علاقة الأفلام بالقتل اللي بيحصل حاليًا!
واستكملت كريمة منصور: كل اللي بيحصل على السوشيال ميديا بالنسبة ليا شيء غريب لازم يكون فيه واقفة وحماية للفنان لأنه بيتعب جدًا وبيدكي حتة من روحه غير المجهود الذي يبذله علشان يسعدكم، لابد أن نحسن المعاملة مع الفنان الهجوم ده نوع من أنواع العنف.
وتطرقت كريمة منصور للحديث، عن الانتقادات التي تعرض لها محمد رمضان خلال الأيام الماضية بعد حادث الطالبة نيرة، قالت: الأفلام اللي بيتم عرضها ملهاش علاقة بالقتل دي شماعة بنعلق عليها، لأن المفروض الإنسان يشتغل على نفسة إحنا مش في غابة، ضبط النفس ده من أسس الإنسان المتحضر وضبط النفسي بييجي عن طريق التثقيف واحترام الآخرين.
واختتمت حديثها قائلة: واقعة هابيل وقابيل الشهيرة وقتل أحدهم للآخر، هل كان أحدهم متأثر بمسلسل مثلا ولا حاجة، العنف موجود منذ بدء الخليقة، وجزء مننا، فكل واحد يشتغل على نفسه، وكل إنسان يشوف مين اللي هيتغلب على مين، هل الجانب المضيء ولا الجانب المظلم.
