محامي حسن شاكوش عن مشادة سعيد الأرتيست وهاني شاكر: كل اللي تقوله النقابة هننفذه
علق إيهاب سيد محامي مطرب المهرجانات الشعبية حسن شاكوش، على انسحاب الفنان هاني شاكر نقيب المهن الموسيقية، من المؤتمر الصحفي الخاص باعتذار موكله لشعبة عازفي الإيقاع.
جاء هذا بعد مشادة كلامية بين سعيد الارتيست ممثل الشعبة، والفنان هاني شاكر في المؤتمر.
وقال محامي حسن شاكوش لـ القاهرة 24: مقدرش أقول أي حاجة عن انسحاب سعيد الأرتيست وهاني شاكر، لأن الموضوع داخل النقابة والقرار هيرجعلهم في الأول وفي الآخر، والمجلس هو الوحيد اللي يقدر يرد على اللي حصل ده.
وأضاف: أي حاجة تقولها النقابة احنا موافقين عليها مقدمًا، ولو قالوا هيبقى فيه مؤتمر تاني أكيد هنيجي، كل اللي النقيب يقول عليه هننفذه.
أما بالنسبة لتداول أنباء حول دفع حسن شاكوش مبلغ نصف مليون جنيه لنقابة المهن الموسيقية، مقابل إنهاء قرار إيقافه، فقال محاميه: دي إشاعة وكدب، والواقع نفسه بيكذبها أصله هيدفع ليه؟، ومينفعش لأن ده يعتبر رشوة، وأكيد ده محصلش.
كما وجه مطرب المهرجانات الشعبية حسن شاكوش، رسالة اعتذار لنقابة المهن الموسيقية برئاسة الفنان هاني شاكر.
وقال حسن شاكوش خلال المؤتمر الصحفي: بشكر كل المجلس ونقابة الموسيقيين وأستاذ هاني شاكر، وأنا كان غصبن عنى لفظ طلع مني، وعملت اجتماع النهاردة عشان أقولهم مش قصدي، وأنا قدمت اعتذارات كتير ودي كانت غلطة واللي جاي أفضل.
