فريدة سيف النصر عن تصريح القبلات المثير للجدل: كنت بهزر ومفيش حد يتكلم عن القرآن يقول كده
تصدر اسم الفنانة فريدة سيف النصر محركات البحث على جوجل بعد استضافتها في أحد البرامج التلفزيونية بعد تصريحاتها عن القبلات في الأفلام، وهو ما أثار ضجة وعرّضها لانتقادات.
تعليق فريدة سيف النصر على تصريحاتها المثيرة للجدل
وقالت فريدة سيف النصر، في تصريحات لـ القاهرة 24، إن حديثها كان في سياق المزاح، وضحكت بعدها، والمذيعة سألتني ليه ما موفقتيش على البوس، فمارضتيش أخسر زمايلي وأزعلهم فقلت كلهم كانوا قمرات لو عليا كنت أبوسهم كلهم، لكن كنت متجوزة والحديث كان هزار.
وتابعت: في حد يتكلم عن النبي والقرآن يقول كده، لكن الحمد لله مشكلتي كل حاجة بعملها بتعمل مشاهدة سواء حديث عن قبلات أو غيره.
وأضافت: قلت جوزي ما قدرش أبوسه وأنا زعلانة منه، ما بالك لو حد غريب، مضيفة: لم أفتي وما قدرش أحلل أو أحرم، وكل واحد هيتحاسب مع نفسه أنا مش مفتية وإحنا شعب ما عندناش كتالوج، بيهاجم وينتقد أي حاجة، لكن الحمد لله عندي ميزة حب عندي ناس كتير بيصدقوني لو قلت كلمة بيدفعوا عني.
ومؤخرا، كشفت فريدة سيف النصر رأيها في مشاهد القبلات بالسينما المصرية، وقالت: لظروف ما، وبسبب جوازة ما، وحاجات كتير، ما كنش ينفع أتباس، أنا كان نفسي والله، يعني كان في ممثلين حلوين كان نفسي أبوسهم، بس مقدرتش.
وأضافت الفنانة: أنا عن نفسي لما كنت أبقى مضايقة من جوزي أو زعلانة منه مبقدرش أبوسه أو أقربله، ببقى واخدة موقف، إنما كان في السينما مثلا يقوموا يرموا مراية على الكاميرا، أو الموجة تضرب، أو الشيش يتكسر، أو القهوة تفور.. ولكن كل واحد حر في نفسه.
