هنادي مهنا عن زيادة وزنها: المحشي والحمام السبب.. وكنت في إسبانيا بتحرك كتير
كشفت الفنانة هنادي مهنا سر رشاقتها وخسارتها وزنها خلال الفترة الماضية، وكواليس درستها في إسبانيا وبداية أعمالها الفنية ودراسة الموسيقى.
تصريحات هنادي مهنا عن خسارة وزنها
وقالت هنادي مهنا خلال لقائها ضمن برنامج كلمة أخيرة: كلنا بنعدي على فترات اكتئاب أو ضغط والوزن بيزيد، وأنا في إسبانيا وقت الجامعة كنت بتحرك كتير أوي ومكنش فيه حد بيطبخ فكنت رشيقة.
وتابعت هنادي مهنا: لما جيت مصر كان فيه دلع كتير أوي محشي وحمام ومسقعة ودي حاجات مينفعش تتساب وماتتكلش.
وأكملت: كنت بدرس في إسبانيا في مجال هندسة الصوت في مجال الموسيقى؛ لأني كنت بحب المزيكا أوي، وكان حلمي أني أغني قبل التمثيل واكتسبت ده من الجينات من أبويا.
واصلت: لما جيت مصر اشتغلت مدرسة ودرست كذا حاجة، وكنت فاتحة شركة مع بابا، وأنا بحب أشتغل من صغري حتى في الصيف من صغري، ومش بحب أقعد في البيت ومش بعرف أقعد في البيت.
وأضاف: لما اشتغلت ممثلة مكنتش مستوعبة طبيعة الشغلانة وأن الشغل موسمي، ممكن يبقى مكثف شهرين متتالين ثم شهرين آخرين قاعدين في البيت مش بنعمل حاجة، ودي كانت حاجة بالنسبة لي كان إحساس غريب، وكنت بقول فيه حاجة غلط لأني متعودة على الشغل اليومي، وأني أنام وأصحى عشان ورايا شغل.
وأردفت: أول ما مثلت الدنيا مامشيتش أوي فضلت سنتين أشتغل ومفيش حاجة تتذاع لحد أول عمل وهو أفراح إبليس اللي لسه معروض قريب رغم الانتهاء من تصويره منذ فترة طويلة، وعملت كمان فيلم ووقف كل ده سببلي في فترة من الفترات عملي اكتئاب، وكنت قاعدة في البيت فقعدت أكل.
واختتمت أن جمهور السوشيال ميديا وقتها انتقدها وكان حقهم، قائلة: الأعمال الي كنت بصورها ومش بتنزل كنت بحط فيديوهات من الكواليس على إنستجرام، والناس تقولي فين الأعمال إنتي بتصوري لنفسك ولا إيه، أنا في الأساس شكلي كان زي الآن بعد فقد الوزن، لكن الفترة دي كانت سبب في زيادة وزني حينها.
